O primeiro anticiclón da primavera enche os areais e os paseos das Rías Baixas
As borrascas e os temporais quedan atrás e o sol anima a pasear e a facer deporte
O luns os termómetros chegarán ata os 25 graos no sur de Galicia
O ceo azul, as temperaturas de máis de 20 graos e o sol radiante sacaron este domingo a xente das súas casas para gozar de actividades ao aire libre. As praias das Rías Baixas e os seus paseos enchéronse de paseantes e deportistas.
O bo tempo desta segunda fin de semana da primavera xa se fai notar nas rúas, nas terrazas e nos paseos das Rías Baixas. Despois dun outono e dun inverno de temporais, en praias como a de Samil vemos xa deportistas, paseantes e mesmo algún bañista.
E a mesma imaxe se repetiu desde a mañá cedo, mesmo co cambio de hora, en areais menos urbanos como por exemplo Praia América, en Nigrán. Días longos e temperaturas agradables, que este luns poderían superar os 25 graos.
Coa primavera no seu arranque xa podemos facer balance da tempada outono-inverno. Está aínda preto pero os recordos varían. A memoria e a meteoroloxía moitas veces non van da man.
