Aviso laranxa por temporal costeiro o luns na Coruña e Lugo
Aviso laranxa por temporal costeiro o luns na Coruña e Lugo
As chuvias activan o aviso amarelo nas catro provincias galegas e noutras no sur de España pola borrasca Efraín
O vento tamén será intenso en moitas zonas da península
O mar golpea no litoral da Coruña
A Dirección Xeral de Emerxencias e Interior da Vicepresidencia Segunda da Xunta acaba de activar para este luns un aviso laranxa por temporal costeiro nas provincias da Coruña e Lugo.
Segundo a Axencia Estatal de Meteoroloxía (AEMET), o fenómeno meteorolóxico adverso de nivel laranxa comezará ás primeiras horas de mañá na Mariña lucense e no noroeste da Coruña por mar combinado do suroeste con ondas de ata cinco metros debido ao mar de fondo e vento do suroeste forza 8 de ata 74 quilómetros por hora.
No resto do litoral galego, o nivel de aviso será amarelo, tamén por mar combinado do suroeste e ondas de ata cincoi metros e mar de fondo e ventos do suroeste forza 7.
Ademais, estará activo o aviso amarelo por precipitacións acumuladas en toda a provincia de Pontevedra, no suroeste da Coruña, no sur de Lugo e no noroeste e na zona do Miño de Ourense.
En canto ao vento, o nivel de aviso será amarelo porque soprará do suroeste con refachos de ata 80 quilómetros por hora na provincia de Pontevedra, na Mariña lucense e no noroeste, oeste e suroeste da Coruña.
A Xunta lembra a importancia de manterse afastado da liña de costa, isto é, diques, rompentes, paseos marítimos, e recomenda que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
A borrasca Efraín pon en aviso 33 provincias en España, aínda que polo de agora nos afecta de xeito indirecto, con humidade e frontes con chuvias abondosas.
