Bicis e patinetes eléctricos gañan terreo na mobilidade das cidades galegas
Bicis e patinetes eléctricos gañan terreo na mobilidade das cidades galegas
O domingo 10 de xullo celébrase o Día mundial dos vehículos de mobilidade persoal
As zonas de velocidade limitada e os carrís bici favorecen o uso destes vehículos, que promoven unha mobilidade máis sostible
O uso dos vehículos de mobilidade persoal duplicouse en España tras a pandemia. Dun millón 300.000 usuarios pasouse a 3 millóns de persoas usuarias habituais.
"Notamos un crecemento exponencial. Non tanto se cadra como as bicicletas que foi fóra de serie e hai mesmo listaxes de espera para conseguir unha bicicleta. No noso caso non é tan espectacular, pero notamos moitísimo crecemento", di o presidente da Asociación coruñesa de usuarios de vehículos de mobilidade persoal Enrique Fernández
Un uso máis estendido que se está a ver favorecido polo aumento da superficie destinada a carrís bici nas cidades e pola sinalización de zonas urbanas de velocidade limitada, baixando de 50 a 30 e incluso a 20km/h.
"Os vehículos de mobilidade persoal como as bicicletas precisamos unha velocidade de convivencia cos outros vehículos, entón precisamos unha velocidade máis calmada e iso axudounos moito. Que pasa? Que iso é un cambio que á hora de mudar na mentalidade do condutor vai levar un tempo. Aínda atopamos moita xente que vai con moita présa, que achucha, que parece que lles estorbamos pola estrada e non se dan conta de que temos tanto dereito a usar a calzada como eles", sinala Enrique Fernández.
Para quen fai uso destes vehículos persoais todo son vantaxes: evita os problemas de estacionamento cunha mobilidade sen ruidos e sen emisións que reduce o impacto ambiental.
A Coruña sumarase ao día mundial dos vehículos de mobilidade persoal, que se celebra este domingo, cun roteiro pola cidade.
