Bildu acorda co Goberno acabar coas pelotas de goma e as devolucións en quente

O grupo parlamentario de Bildu no Congreso pactou co Goberno de coalición reformar a Lei de seguridade cidadá, aprobada en 2015 polo Goberno de Rajoy.

Segundo anunciou en conferencia de prensa a portavoz de Bildu no Congreso, Mertxe Aizpurua, a reforma supoñerá acabar co uso das actuais pelotas de goma por parte das Forzas de Seguridade e rebaixar a penalización da desobediencia, que pasará de ser unha infracción grave a leve.

Ademais, a formación abertzale pactou presentar nun prazo de seis meses unha reforma da Lei de estranxeiría para poñer fin ás coñecidas como 'devolucións en quente' de migrantes na fronteira.

Aizpirua destaca que o novo texto lexislativo  "recolle todos os acordos e avances logrados" entre PSOE, PNV e Unidas Podemos na anterior lexislatura, pero que non contaron co apoio de Bildu e ERC porque os consideraban insuficientes.

"Con este acordo desbloqueamos a situación e logramos que a gran materia pendente, terminar coa 'lei mordaza', vai facerse realidade".

O acordo entre o Goberno e Bildu, ao detalle

A nova lei de Seguridade Cidadá prevé a substitución progresiva das pelotas de goma por parte das forzas de seguridade "por outros medios menos lesivos". 

Pretende acabar tamén coas sancións "inxustificadas ou baseadas en interpretacións subxectivas" nas faltas de respecto á autoridade. Con isto, preténdese "protexer o dereito á liberdade de expresión".

Así, consideraranse infraccións leves os insultos ou inxurias cando o destinatario sexa un membro das forzas de seguridade no exercicio das súas funcións. Pero só poderán sancionarse cando sexan "expresións relevantes".  A infracción quedará sen efecto cando o sancionado se desculpe ou se retracte.

Respecto ás 'devolucións en quente', o pacto de Bildu co PSOE e Sumar contempla que no prazo máximo de seis meses se inclúa unha nova disposición adicional da Lei de estranxeiría para establecer "como criterios o respecto e aplicación da normativa de Dereitos Humanos e protección internacional" na política migratoria á hora de poñer en marcha o proceso de posible expulsión.

O PP critica que dite a lei de seguridade "herdeiros" de quen creou máis inseguridade

O portavoz do Partido Popular no Congreso dos Deputados, Miguel Tellado, criticou este xoves en Toledo que Bildu vaia ditar a reforma da lei de seguridade cando son os "herdeiros" da banda terrorista que máis inseguridade xerou en España durante décadas."

"Bildu vai decidir cales son as normas que se aplican ás Forzas de Seguridade do Estado, a seguridade da Policía e da Garda Civil vai estar en mans de quen segue levando nas súas listas a quen os matou", afirmou Tellado.

O voceiro popular lamentou tamén que Bildu "está a esixir a saída de prisión de asasinos e terroristas" e que o Goberno vasco de PNV e PSOE estéallo concedendo.

"E non ocorre por decisión dun xuíz, como di falsamente o ministro Marlaska, ocorre pola omisión da Fiscalía, que non o recorreu e xa sabemos de quen depende a Fiscalía porque nolo explicou o propio presidente do Goberno non hai moito tempo", aseverou Tellado.

Así mesmo, dixo: "Persoalmente sinto nauseas vendo á líder de Bildu, Merche Aizpurúa, falar hoxe de dereitos humanos e considerou: "Ver a Bildu liderar a modificación da lei de seguridade cidadá dá idea do nivel de podremia que alcanzado o Partido Socialista da man de Pedro Sánchez.