Caída histórica da libra e críticas do FMI polo plan fiscal do Goberno británico
Caída histórica da libra e críticas do FMI polo plan fiscal do Goberno británico
O Fondo Monetario Internacional critica a redución de impostos a rendas altas nun contexto de alta inflación e advirte do aumento das desigualdades sociais
O Banco de Inglaterra realizará unha compra extraordinaria de débeda pública para calmar o mercado
O Goberno de Truss ven a depreciación da libra como algo temporal e defenden o seu plan financeiro
A libra esterlina segue caendo este mércores no mercado de divisas fronte ao dólar e ao euro debido á preocupación dos investidores polo plan do goberno británico de impulsar o crecemento a través dunha gran redución de impostos sobre todo para empresas e ingresos elevados.
A moeda do Reino Unido caía a media xornada 1,35 % fronte ao dólar, ata os 1,05 dólares, e un 1,01 % fronte ao euro, ata os 1,10 euros. O pasado luns, a libra alcanzou o seu mínimo histórico fronte á moeda estadounidense, cotizándose a 1,03 dólares en resposta ao programa fiscal anunciado polo Executivo conservador o pasado venres.
O Banco de Inglaterra anunciou este mércores que ata o 14 de outubro realizará unha compra extraordinaria de débeda pública británica a longo prazo para tratar de estabilizar ese mercado, especialmente afectado pola reacción á estratexia económica do goberno.
O banco, que mantén a súa intención de subir os tipos de xuro na súa próxima reunión do 3 de novembro, indicou que "se a disfunción neste mercado continuase ou empeorase", cun incremento aínda maior da prima de risco, "existiría un risco para a estabilidade financeira do Reino Unido.
O Fondo Monetario Internacional (FMI) criticou o plan fiscal do Reino Unido ao considerar que é inadecuado no contexto actual de elevada inflación e porque "probablemente aumentará a desigualdade social" favorecendo as rendas altas.
O FMI recomendou ao Executivo conservador de Liz Truss que aproveite unha intervención prevista para o 23 de novembro para "repensar as formas de prestar apoio máis específico e reavaliar as medidas fiscais, especialmente aquelas que benefician as persoas con ingresos elevados".
Os partidarios do proxecto de lei Truss, con todo, argumentan que o goberno ten razón ao ver a recesión como un risco maior que a inflación e acusan ao FMI de promover políticas económicas excesivamente convencionais, ao tempo que ven a depreciación da libra como un axuste temporal.
