Carlos de Inglaterra sae do hospital despois da súa operación de próstata

O rei de Inglaterra, Carlos III, abandonou este luns o hospital londiniense onde estaba ingresado desde o pasado venres, cando foi operado dun agrandamento da próstata.

Carlos III saíu do London Clinic, no centro de Londres, pouco antes das tres da tarde acompañado pola raíña Camila.

"O rei recibiu esta tarde a alta do hospital tras un tratamento médico planificado e reprogramou os próximos compromisos públicos para permitir un período de recuperación privada", sinalou o Palacio de Buckingham nun comunicado.

De 75 anos, Carlos III agradeceu o traballo do equipo médico que o atendeu, así como todas as mensaxes de bos desexos que recibiu os últimos días.

Unha multitude de curiosos e xornalistas apiñábanse á saída do hospital para saudar ao monarca, que apareceu riseiro e en aparente bo estado.

Segundo os medios británicos, Buckingham prevé que Carlos III non participe en actividades oficiais durante un mes para poder completar a recuperación.

Apenas unhas horas antes abandonara ese mesmo centro a nora do rei, Catarina, princesa de Gales, quen foi sometida hai case dúas semanas a unha "cirurxía abdominal", da que apenas se deron detalles.

Catarina, de 42 anos, que regresou ao seu fogar en Windsor para continuar alí a recuperación, "está a realizar un bo progreso", segundo unha nota da súa casa oficial, o Palacio de Kensington.

O príncipe de Gales, Guillerme, non asumiu funcións oficiais mentres a súa esposa permaneceu hospitalizada e tampouco o fará durante a convalecencia para acompañala e coidar dos seus tres fillos, os príncipes Xurxo, Carlota e Luís.