O rei Filipe advirte contra "a negación do outro" nos Premios Princesa de Asturias

O público do Teatro Campoamor de Oviedo recibiu en pé os reis, a  princesa Leonor e a infanta Sofía. Comezaba a gala da cuadraxésimo cuarta edición dos Premios Princesa de Asturias.

Unha cerimonia con máis protagonismo para unha herdeira da Coroa xa maior de idade. Leonor de Borbón glosou os logros dos galardoados. Púxoos como exemplo para reivindicar a esperanza fronte ao escepticismo.

"Sempre hai unha fenda por onde pasa a luz. Esa é a esperanza que nos contaxian os nosos galardoados, mulleres e homes que conxugan na súa vida o esforzo, a dedicación e a excelencia", sinalou.

E o rei Filipe alertou dos riscos da deshumanización.

"A negación do outro polas súas conviccións ou crenzas, porque pensa, reza ou vota distinto", dixo o monarca.

Entregáronse varios premios colectivos, aos científicos que lograron desenvolver os fármacos contra a obesidade e a diabetes; á Organización de Estados Iberoamericanos para a Educación e a axencia de fotografía Magnum. E outros individuais para  escritora romanesa Ana Blandiana, a ilustradora franco-iraniana, Marjane Satrapi, e o expolítico canadense, Michael Ignatieff. Todos recibiron a calor do público, pero de xeito especial os premiados españois, a deportista Carolina Marín e o cantautor e compositor Joan Manuel Serrat.

O himno de Asturias puxo fin á cerimonia. E tamén ao son das gaitas, como cada ano, os galardoados abandonaron entre aplausos o Teatro Campoamor.