Charlie Uzal: "Estamos preocupados pola pista do Coliseum"

 "Estamos preocupados", recoñece Charlie Uzal, director deportivo do club laranxa.

"A idea é empezar o día 10 (de setembro), pero temos un pouco esa incerteza. Temos que facer un partido test. Canto antes empecemos alí... Non somos un equipo consolidado e o factor cancha é clave. Canto máis adestremos alí, máis nos axudará. Xa os concertos limítannos e estaremos gran parte da tempada a cabalo. Tamén inflúe o material de cada unha das pistas para os xeonllos", asegura.

Desde o principio do mes de agosto o Leyma sabe que non poderá dispoñer da pista do Coliseum ata o 9 de setembro. Na reunión da comisión de seguimento do convenio informáronlle deste novo prazo, aínda que desde o Concello defenden que o único compromiso era tela lista antes do inicio da ACB, o 29 de setembro.

O club laranxa a espera para esa data, pero a entrega podería atrasarse mesmo ata o día 15. E non só é o contratempo dunha pretemporada lonxe de casa, é que o Leyma recibiu unha notificación do Concello nos últimos días na que lle informa de que non poderá dispoñer no Coliseum dun espazo ofrecido no que proxectara montar un ximnasio, segundo fontes do Básquet Coruña.

Xa con todo o material comprado, o club laranxa e o Concello buscan alternativas dentro da propia instalación.