Conceden indemnizacións para os afectados polo cártel dos coches
Dúas sentenzas da Audiencia Provincial de Ourense abren a porta a futuras reclamacións de todas aquelas persoas que comprasen un coche entre os anos 2007 e 2013
As sentenzas condenan dúas marcas a indemnizar os compradores por pactaren os prezos para evitar a competencia
As sentenzas da Audiencia Provincial de Ourense condenan a Ford e a Renault a indemnizar con 6.200 euros catro clientes afectados polo denominado cártel dos coches. Estiman que pagaron un 5 % de máis e obriga as demandadas a devolverlles eses cartos mais os xuros xerados desde a compra.
Juan José Pérez Barreiro, avogado dos compradores indemnizados: "Un 3 % a maiores. O que podería conseguir un consumidor é arredor do 8 % do prezo de compra do vehículo".
O tribunal considera probado que houbo pacto de prezos, tal e como ditaminara xa en 2015 a Comisión Nacional dos Mercados e a Competencia nunha resolución que condenaba o 93 % das empresas do mercado da automoción a pagaren 171 millóns de euros por esta práctica abusiva.
Juan José Pérez Barreiro, avogado dos compradores indemnizados: "Non hai que probar ese cártel, ese acordo, iso xa está probado. O único que hai que probar é ser un prexudicado e o dano sufrido".
A agrupación de afectados polo cártel dos coches calcula que hai uns catrocentos mil galegos nesta situación, pero algúns xulgados consideran que o asunto xa está prescrito.
