Condena de 15 anos de cárcere para un home que agrediu sexualmente a filla da súa parella

A sección segunda da Audiencia Provincial da Coruña condenou a 15 anos de cárcere o autor dun delito continuado de agresión sexual sobre a filla menor de idade da súa parella. Ademais, deberá abonarlle á vítima unha indemnización de 18.000 euros polos danos morais causados.

Segundo informa o Tribunal Superior de Xustiza de Galicia (TSXG), os maxistrados consideran probado que o acusado violou a menor cando tiña once anos, "aproveitando a súa condición de esposo da nai". Segundo relatan na sentenza, o home advertiu a pequena que non llo contase á nai porque, de facelo, habería consecuencias para ambas. Tamén consideran acreditado que se produciu outra agresión dous meses despois.

O tribunal explica que, para considerar a verosimilitude da declaración da vítima, despois de que corrobora múltiples extremos, tamén contan co informe emitido polo equipo psicosocial do Instituto de Medicina Legal de Galicia (Imelga).

Destacan tamén que "a dinámica comisiva é esencialmente a mesma pois nun dos episodios emprégase intimidación e, no outro, ademais violencia", así como que os feitos suceden "na vivenda, na habitación do acusado, sempre coa escusa de ver a televisión".

A Sala conclúe que resultou desvirtuada a presunción de inocencia e, en consecuencia, acreditada a autoría do acusado. A sentenza non é firme, pois cabe presentar recurso ante o TSXG.