Condenan a 14 anos de cárcere un pai por abusar sexualmente da súa filla

A Audiencia de Pontevedra impuxo 14 anos de cárcere a un home que, durante case dous anos, abusou sexualmente da súa filla, unha menor que cando comezaron estes episodios tiña 14 anos. O tribunal condenouno a doce anos de prisión por un delito de abuso sexual e a outros dous anos por un delito de embaucamento sexual, así como dez anos de liberdade vixiada, a contar desde que salga do cárcere, por cada un dos dous delitos.

O acusado non poderá ademais achegarse a menos de 200 metros nin comunicarse coa súa filla durante dez anos máis da pena imposta, é dicir 24 anos, terá que indemnizala con 30.000 euros e quedará inhabilitado para traballar con menores.

A sentenza considera probado que o acusado, desde que a súa filla tiña 14 anos, empezou a darlle bicos con lingua á súa filla, "dicíndolle que era normal na familia darse bicos así, pero que non llo contase a ninguén", para días despois comezar a tocala nos peitos. Este comportamento volveuse cada vez máis repetitivo, ata que chegou a ser diario.

Nos períodos en que estaba embarcado, comezou a solicitarlle á súa filla fotos e vídeos con roupa axustada, con roupa interior e espida, ao que esta adoitaba acceder baixo ameazas. Se a menor non atendía á súa demanda, enfadábase ou castigábaa, "chegando mesmo a dicirlle que lle levantaba o castigo se cando el asubiase, ela se espía ou lle enviaba un vídeo espíndose ou duchándose", relata a sentenza.

Cando a menor fixo os 15 anos, o seu pai comezou a deitarse na cama con ela, "pedíndolle que puxese algún camisón determinado ou que estivese espida", e nunha destas ocasións agrediuna sexualmente penetrándoa cos dedos. Este comportamento cesou cando a menor lle contoulle a súa nai e a súa tía o que estaba a pasar, momento en que presentaron denuncia contra o acusado.