Galicia amplía a esixencia do certificado covid e iniciará a vacinación infantil a partir do 13 de decembro
Galicia amplía a esixencia do certificado covid e iniciará a vacinación infantil a partir do 13 de decembro
Galicia amplía a esixencia do certificado covid e iniciará a vacinación infantil a partir do 13 de decembro
O certificado esténdese a ximnasios, hospitais de día, centros de diálise e residencias de maiores
A vacinación para menores de 60 anos comeza o 19 de decembro
Galicia ampliará a esixencia do certificado covid en lugares pechados como ximnasios, hospitais de día, unidades de diálise ou residencias de maiores, e empezará a vacinar os nenos de 5 a 11 anos a partir do 13 de decembro e o 19 a menores de 60 anos coa terceira dose.
Na conferencia de prensa tras o Consello da Xunta, o presidente Alberto Núñez Feijóo informou de que as doses para a poboación infantil chegarán a España o 13 de decembro. A Xunta conta con recibir entre 55.000 e 58.000 doses para o grupo de nenos de entre 5 e 11 anos, un grupo que en Galicia ascende a unhas 130.000 persoas.
Neste sentido, precisou que dos 1.300 nenos contaxiados, 1.000 son menores de 12 anos, é dicir, están sen vacinar. "Nos centros de educación primaria é onde temos o maior problema", dixo, de aí que amosara a súa preocupación por tratar de iniciar canto antes a vacinación deste grupo.
En canto á ampliación do certificado covid, será unha medida que analizará mañá o subcomité clínico e que precisa da autorización previa do Tribunal Superior de Xustiza de Galicia (TSXG). Todos os espazos pechados con posibilidade de contaxio, sobre todo ximnasios, residencias de maiores e lugares con persoas inmunodeprimidas como hospitais de día onco-hematolóxicos e unidades de diálise.
Feijóo advertiu que a situación epidemiolóxica está "a empeorar" nas últimas semanas, a pesar do cal a situación asistencial nos hospitais segue sendo "relativamente boa", polo que insistiu en pedir "prudencia" e manter "a menor interacción social posible", sobre todo na próxima ponte festiva.
Dependendo de se se mantén a responsabilidade nas medidas de seguridade, hai dous escenarios ben distintos para o Nadal, avisou, o peor dos cales supoñería un empeoramento da situación epidemiolóxica durante todo o mes de decembro e as consecuentes medidas para paliala.
Minuto a minuto
Comeza a conferencia de prensa posterior ao Consello da Xunta
"A incidencia está empeorando", di Núñez Feijóo, que constata que Galicia está por riba da media de España en incidencia, aínda que con menor ocupación de UCI e hospitalización.
Respecto da vacinación, o presidente di que "comezou a inocularse a terceira dose no grupo de 60-69 anos que queremos rematar antes do 19 de decembro, e tamén a todo o persoal sanitario e socio-sanitario",
"O 13 de decembro chegarán as primeiras doses para a poboación infantil". España recibirá 1,3 millóns de doses, di Feijóo, que di que "a Galicia corresponderíanlle 55.058 vacinas". "Empezaríamos con nenos inmunodeprimidos e seguiremos por criterios de idade"
"A situación epidemiolóxica está clarisimamente empeorando nas últimas semanas", pero "non é igual que hai un ano".
"En función do comportamento individual e colectivo dos vindeiros días, especialmente na ponte, estaremos ante unha prospección máis razonable de baixar o número de novos contaxios ou se se intensifican as interaccións seguriá subindo a incidencia".
Ademais da hostalaría, "pediremos certificado covid en ximnasios, hospitais de día, unidades de diálise e residencias de maiores"
En materia industrial, o presidente anuncia que "abrimos unha consulta para que as empresas realicen manifestacións de interese de investimentos. Trátase de poñer en marcha espazos industriais compartidos"
A Xunta investirá 8 millóns de euros para mercar 50 robots que tramiten expedientes administrativos repetitivos da administración autonómica"
A Xunta investirá 26 millóns de euros na adquisición de cinco tipos de medicamentos destinados a tratar a esclerose múltiple, que sofren en Galicia unhas 3.000 persoas
En materia social, o Consello acordou manter a tarxeta básica para alimentos disposta para atender familias vulnerables durante a emerxencia sanitaria. Chegou a 57.000 beneficiarios que percibiron entre150 e 300 euros ao mes. "Manteremos o crédito ata o primeiro semestre do ano 22".
No eido de Igualdade, o Executivo autonómico deulle luz verde a algo máis de 5 millóns de euros para axudas mensuais ás vítimas de violencia machista. Ademais, destina 450.000 euros a entidades sociais que atenden necesidades dunhas 700 persoas vítimas de trata
Núñez Feijóo anuncia que a Xunta vai presentar un recurso "para defender o nome da Ría de Ribadeo", porque "non hai soporte legal para defender esa decisión". "Non entendemos a decisión", insiste o presidente, polo que "recorremos a decisión do Goberno central"
Comeza a quenda de preguntas
