Continúa a queima de colectores no conflito da folga do lixo da Coruña
Continúa a queima de colectores no conflito da folga do lixo da Coruña
O sindicato STL anuncia accións legais contra o Concello por vulnerar o dereito á folga
A empresa contratada para a limpeza retirou máis de duascentas toneladas de residuos
Na Coruña mantense a folga do lixo. En tres días a empresa contratada polo Concello tras decretar a emerxencia sanitaria retirou máis de duascentas toneladas de residuos.
O centro da cidade vai recuperando a normalidade, pero o lixo segue moi presente nos barrios periféricos. Tamén continúan os actos vandálicos.
A noite pasada os bombeiros realizaron seis intervencións relacionadas coa queima de colectores. Desde o inicio do conflito arderon preto de cento cincuenta, unha cifra que, traducida a cartos, rolda os 400.000 euros.
O dano económico é só unha das consecuencias da folga que comezou no San Xoán e continúa deixando unha realidade insalubre en moitos barrios.
Negociacións
As negociacións non avanzan. Prezero, concesionaria do servizo, non quere cederlle poder de contratación ao sindicato STL nin retirar o centenar de expedientes disciplinarios abertos a traballadores.
O sindicato maioritario anunciou accións legais contra o Concello da Coruña. Considera que a declaración de emerxencia sanitaria vulnera o dereito de folga.
