Corea do Norte lanza dous mísiles de cruceiro ao mar Amarelo

Corea do Norte disparou hoxe dous mísiles de cruceiro ao mar Amarelo (chamado mar do Oeste nas dúas Coreas), segundo adiantou a axencia Yonhap citando fontes militares surcoreanas.

Trátase do primeiro lanzamento de mísiles de cruceiro por parte norcoreana desde o pasado xaneiro. Os servizos de intelixencia de Corea do Sur e dos Estados Unidos están a analizar o novo ensaio armamentístico norcoreano e que os aliados manteñen a súa posición de preparación militar.

A acción norcoreana chega apenas dous días despois de que o presidente surcoreano, Yoon Suk-yeol, ofrecese un plan de axuda económica a Corea do Norte no caso de que o réxime optase pola desnuclearización.

O lanzamento norcoreano prodúcese ademais a falta de poucos días para que os EUA e Corea do Sur retomen unhas manobras militares a gran escala que aparcaran para favorecer o achegamento co Norte, un proceso que se malogrou tras o fracaso do cume sobre desnuclearización de Hanoi a principio de 2019.

En todo caso, o uso deste tipo de proxectís por parte norcoreana non está castigado polas sancións da ONU, que se centran nos mísiles balísticos e os ensaios nucleares do réxime.

Corea do Norte leva illada do exterior desde que comezou a pandemia en 2020 e este ano realizou un número récord de ensaios de proxectís tras aprobar o ano pasado un plan de modernización armamentística.

O réxime rexeitou a axuda sanitaria e ofertas de diálogo de Washington e Seúl -que están a responder á súa vez cunha "disuasión estendida"- e concluíu xa preparativos para realizar o seu primeiro test nuclear en cinco anos.