Deteñen uns 1.200 bolsonaristas no desaloxo do seu campamento en Brasilia

Polo menos 1.200 bolsonaristas foron detidos este luns no campamento que montaran fronte ao cuartel xeral do Exército en Brasília desde as eleccións de outubro e desde o que foron lanzados os ataques do domingo contra as sedes dos tres poderes no Brasil.

Os seguidores do expresidente Jair Bolsonaro, que non recoñecen a vitoria do líder progresista Luiz Inácio Lula da Silva nas eleccións presidenciais, foron detidos despois de que, cercados pola policía e o Exército, desmontasen pacificamente o campamento en que se refuxiaban.

Segundo o Ministerio de Xustiza, os bolsonaristas detidos foron conducidos en polo menos 40 autobuses ata a sede da Policía Federal, onde serán identificados para tentar establecer se participaron nos ataques violentos do domingo e fichados por se nun futuro xorden probas na súa contra.

300 detidos máis este domingo

Tan só permanecerán arrestados os que sexan sinalados como participantes no asalto e os que teñan algún indicio na súa contra. Sumaranse ás preto de 300 persoas que foron detidas o domingo pola súa responsabilidade nos ataques.

O desaloxo foi pacífico e produciuse despois de que o maxistrado Alexandre de Moraes, un dos once membros da Corte Suprema, ordenase o desmonte de todos os campamentos montados por bolsonaristas fronte a cuarteis militares do país e desde o que defendían un golpe de estado en Brasil contra Lula.

Moraes, responsable por varias das investigacións contra Bolsonaro e os seus seguidores por ataques á democracia, ordenou que os ocupantes dos campamentos "sexan detidos en flagrante pola práctica de diferentes crimes".

O campamento dos radicais en Brasilia, montado hai máis de 70 días, desde que Lula se impuxo na segunda volta das presidenciais, serviu de base para os manifestantes que invadiron o domingo as sedes dos tres poderes do Brasil e foi o lugar ao que regresaron tras o seu fracasado intento de forzar un golpe de estado.

Orde de desaloxo e evacuación pacífica

Axentes da Policía Militarizada de Brasilia, reforzados por tropas do Exército, bloquearon os accesos ao campamento á primeira hora deste luns para impedir a chegada de máis manifestantes e ordenaron o desaloxo pacífico dos que permanecían no lugar.

Sen a necesidade do uso da forza por parte das autoridades, os seguidores do expresidente Jair Bolsonaro, quen negou calquera responsabilidade nos actos destas persoas, comezaron a recoller as súas pertenzas e a abandonar o lugar.

En só media hora, no campamento tan só quedaron as carpas e algunhas infraestruturas abandonadas, así como un puñado de manifestantes que se apresuraban para recoller colchóns e outros utensilios.

Había uns 200 radicais no campamento fronte ao cuartel xeral do Exército. Pero o sábado o número saltou a preto de 3.000, logo de que os bolsonaristas convocasen a manifestación do domingo en Brasilia, que terminou en caos e no ataque ás institucións.

Ante o caos xerado polo asalto ás edificacións públicas, Lula decretou a intervención federal da área de seguridade de Brasilia ata o próximo 31 de xaneiro, co que as policías rexionais estarán baixo control do Goberno federal.

O asalto ao Congreso, a Presidencia e o Supremo resolveuse despois de catro horas e media de desconcerto, cando axentes antidisturbios cargaron e lanzaron gases lacrimóxenos contra os exaltados que estaban dentro e fóra dos edificios dos tres poderes, nuns ataques que foron amplamente condenados por todas as institucións do Brasil e pola comunidade internacional.