Detidas tres persoas en Vigo, entre elas un menor, por agredir unha persoa sen fogar

En Vigo, a policía detivo tres individuos, entre eles un mozo menor de idade, por agredir unha persoa sen fogar en plena rúa, e sen que mediase provocación ou discusión previa..

Están acusados dun delito de odio.

Os feitos ocorreron a principios de marzo nunhas galerías comerciais na zona do Calvario.

Os mozos atoparon unha persoa sen recursos durmindo no chan e comezaron a cuspirlle e a lanzarlle moedas con forza.

Cando a vítima acordou e lles recriminou a súa actitude, un dos mozos agarrouno mentres outro o golpeou na cabeza. Por esta agresión, o home tivo que ser atendido nun centro sanitario.

Fontes policiais explicaron que entre o grupo agresor e a vítima non existía relación previa algunha, "tratándose dunha agresión de carácter gratuíto, sendo o único motivo da mesma que esta persoa non tivese fogar".

 As dilixencias foron remitidas ao Xulgado de Garda de Vigo e tamén se puxeron en coñecemento da Fiscalía Especial de Delitos de Odio.