Detido un veciño de Vigo por ameazar a policía cun machete de cociña tras causar ruídos
A policía local acudiu ao seu domicilio tras as queixas dos veciños, que alertaron de música alta e ruídos na súa casa
O machete de cociña que empregou o veciño de Vigo
Axentes da Policía Local de Vigo tiveron que facer uso de gas pementa para deter un veciño de Vigo que os recibiu cun machete na man cando chamaron a súa porta para que baixase a música. Os feitos producíronse na madrugada, nun inmoble situado na rúa Escultor Gregorio Fernández.
A Policía desprazouse ata alí atendendo as queixas dos veciños, molestos co outro veciño que a esas horas tiña a música alta na súa vivenda, da que saían ademais fortes ruídos que impedían o descanso.
Os axentes chamaron en repetidas ocasións ao timbre sen obter resposta, de modo que comezaron a golpear a porta mentres se identificaban a berros como policía.
No momento en que o veciño abriu a porta, levaba un machete de cociña na man; ameazou con el os axentes e a seguir volveu pechar a porta.
A dotación solicitou o apoio doutras unidades que se desprazaron ao lugar provistas de escudos e chamaron de novo á porta.
O home abriu portando novamente o machete; nese momento, protexidos polos escudos, os axentes asperxéronlle o rostro con gas pementa para proceder a reducilo e detelo como presunto autor dun delito de atentado e ameazas graves.
.png)
