Dimite o ministro principal de Escocia
Dimite o ministro principal de Escocia
Os seus socios de coalición, os Verdes, apoiaron unha moción de censura contra el
![](https://img-g24-crtvg.flumotion.com/prog24/2024/20240429/ESCOCIA.jpg)
O independentista Humza Yousaf anunciou este luns a súa renuncia como ministro principal de Escocia, despois de que os seus socios de coalición, os Verdes, decidisen retirar o seu apoio ao Executivo e apoiar unha moción de censura contra el.
Yousaf, líder do Partido Nacional Escocés (SNP), compareceu en Bute House -residencia oficial do mandatario escocés- para declarar que abandona a xefatura do seu partido, o que implica directamente a súa dimisión como ministro principal de Escocia tras 13 meses á fronte do Goberno rexional. O político seguirá en funcións ata que o SNP elixa novo líder.
"Non podo expresar a honra que supón ser o primeiro ministro do país que amo, o país no que crío á miña familia e o único país ao que algunha vez chamarei fogar", dixo Yousaf.
O líder independentista engadiu que cando era neno nunca soñou co privilexio de dirixir o país.
"A xente que se parecía a min non ocupaba postos de influencia política", engadiu, facendo referencia á súa condición de primeira persoa non branca que exerce o papel de ministro principal en Escocia.
O dirixente do SNP afrontaba dúas mocións de censura contra el e o seu Goberno presentadas respectivamente por conservadores e laboristas, tras romper o xoves un pacto de gobernabilidade cos Verdes por desacordos internos.
Ash Regan, a única deputada do partido independentista Alba, era a peza clave para permanecer no goberno e na súa primeira reacción ao anuncio mostrouse estrañada por que "algúns no propio partido de Yousaf preferisen velo renunciar antes que negociar cun partido que quere promover a independencia".
Yousaf, que sucedeu hai un ano a Nicola Sturgeon, contaba con 63 deputados nun lexislativo rexional de 129. Co voto de Regan, sumaría 64, fronte aos 64 restantes. O presidente, que é neutral, adoita votar polo 'statu quo' en caso de empate.
O Partido Nacional Escocés terá que escoller agora un sucesor.