Edmundo González di que non sufriu ningunha presión do Goberno español

Ante a repercusión que tivera a denuncia de Edmundo González Urrutia sobre as coaccións que sufrira antes de saír de Venezuela, o líder opositor aclarou nas últimas horas que non recibira presións do Goberno de España. O ministro de Exteriores agradeceullo e esixiu desculpas do Partido Popular, que pedira a súa dimisión e a do embaixador. 

No comunicado emitido onte á tarde, Edmundo González Urrutia afirma tallante: "Non fun coaccionado nin polo Goberno de España nin polo embaixador español en Venezuela". Subliña que as xestións diplomáticas tiveron como único propósito facilitar a súa saída do país e sen exercer ningunha presión. O líder opositor engade que todas as xestións foron supervisadas e facilitadas directamente polo ministro de Exteriores, asegurando, di, o seu benestar e liberdade de decisión.

Estas palabras agradeceunas o propio José Manuel Albares. Na súa conta de X, deulle as grazas por defender a verdade fronte ás calumnias e inxurias contra España e o seu servizo exterior. E dirixíndose directamente ao PP e a Alberto Núñez Feijóo, engadiu. "Hai momentos para ser oposición e outros nos que hai que ser un só país".

A lea política en España armouse a raíz desta imaxe, a que mostrou o presidente da Asemblea Nacional do encontro na sede da embaixada española, e en presenza do embaixador Ramón Santos.

O presidente de Venezuela Nicolás Maduro asegurou este xoves que o abandeirado da oposición maioritaria Edmundo González Urrutia lle pediu "clemencia" para saír do país, á vez que negou que houbese algún tipo de coacción por parte do Goberno contra o antichavista para concretar o seu exilio cara a Madrid.

"Dáme pena allea que vostede señor González Urrutia, que me pediu clemencia a min, non teña palabra, (que) non teña palabra co que se empeñou e alegue a súa propia torpeza e a súa propia covardía para tratar de salvar eu non sei que", dixo o mandatario durante un acto transmitido pola canle estatal Venezolana de Televisión.

Maduro respondeu así ao opositor, que o mércores denunciou sufrir "coacción, chantaxes e presións" que o levaron a asinar unha carta que permitiu que lle outorgasen o salvoconduto para tomar o voo, nun avión das Forzas Aéreas españolas, que finalmente o levou desde Caracas ata España, onde solicitou asilo político.

O abandeirado do maior bloque antichavista, a Plataforma Unitaria Democrática (PUD), asegura que o documento foi presentado por representantes do Goberno baixo a ameaza de que se non o asinaba tería que aterse ás consecuencias, unha "coacción" que, na súa opinión, anula o texto.

Con todo, Maduro reiterou este xoves que non houbo presións, senón que, como dixo o presidente do Parlamento Jorge Rodríguez, foi unha negociación cordial, solicitada por González Urrutia. "Ninguén pode alegar a súa propia covardía e a súa propia traizón aos seus seguidores. Eu non sei que vai salvar porque xa perdeu a súa moral para sempre, e aquí estamos os venezolanos, que si que estamos en Venezuela, dispostos a seguir traballando por esta terra, por esta patria, pola paz, pola vida e polo desenvolvemento real da nosa república", subliñou o líder chavista.

O Partido Popular acusou a diplomacia española de estar ao servizo do Goberno de Maduro.
O eurodeputado Esteban González Pons foi máis alá e acusou o Goberno de, dixo literalmente, estar implicado como cooperador necesario no golpe de Estado en Venezuela. O PSOE pide a súa dimisión e que Núñez Feijóo pida perdón.