En tres meses comezará a funcionar a Axencia Española de Intelixencia Artificial na Coruña

A Axencia Española de Supervisión da Intelixencia Artificial (AESIA), que terá a súa sede na Coruña, estará en funcionamento nun prazo máximo de tres meses, segundo recolle o real decreto polo que se aproba o seu estatuto, que publica este sábado o Boletín Oficial do Estado (BOE).

O Consello de Ministros deulle luz verde o 22 de agosto á creación da AESIA, adscrita ao Ministerio de Asuntos Económicos e Transformación Dixital na Secretaría de Estado de Dixitalización e Intelixencia Artificial.

España convértese así no primeiro país europeo en ter un órgano destas características e anticípase á entrada en vigor do Regulamento Europeo de Intelixencia Artificial.

Establecerá para os Estados membros a obriga de seleccionar unha autoridade nacional de supervisión que se encargue de controlar a aplicación da normativa en materia de intelixencia artificial.

A axencia será clave para xestionar e liderar un ecosistema español de intelixencia artificial responsable, grazas á supervisión de forma voluntaria ata a entrada en vigor da normativa europea a través de selos de calidade e responsabilidade.

Ademais, encargarase de xerar contornas de proba reguladas que permitan poñer en marcha innovadores e desenvolvedores de sistemas de intelixencia artificial de alto risco ou de propósito xeral de maneira responsable, conforme o real decreto.