Enquisas: o bloque da dereita mantén a maioría absoluta, pero perde apoios
Enquisas: o bloque da dereita mantén a maioría absoluta, pero perde apoios
As catro sondaxes que se publican este luns reflicten unha recuperación do PSOE respecto aos anteriores barómetros, aínda que a suma de PP e Vox podería facilitar un goberno da dereita
Ata catro enquisas distintas publicadas este luns por diferentes medios de comunicación manteñen o Partido Popular como primeira forza en intención de voto, aínda que a tendencia apunta a unha perda de apoios respecto a anteriores sondaxes e a unha recuperación do PSOE, que recorta algo de distancia.
Con todo, tres das catro prevén a que a suma de deputados do bloque da dereita (PP e Vox) podería permitir a investidura dun goberno liderado por Núñez Feijóo.
Segundo a sondaxe de NC Report para La Razón, o PSOE podería superar os 100 deputados, mentres que o bloque da dereita mantería a maioría absoluta pero con menos apoios tanto ao PP como a Vox.
Os populares seguirían, con todo, gañando as eleccións con 143-145 deputados, un escano menos que o publicado nas sondaxes a semana pasada, e Vox obtería entre 37 e 39 escanos.
O PSOE podería superar a barreira simbólica dos 100 deputados ao moverse entre os 99 e os 101 escanos e Sumar entre 31 e 33.
O barómetro de 40dB para El País e a Cadena Ser apunta tamén a un retroceso do bloque da dereita que lle podería custar incluso a maioría absoluta.
De acordo con esta sondaxe, o PP perdería 11 asentos en só dúas semanas —gañaría as eleccións co 30,9 % dos votos e obtería 125 deputados—, mentres que Vox melloraría a súa expectativa de voto en máis dun punto e obtería 43.
O PSOE, en cambio, recuperaría máis dun punto, ata o 28,7 % dos votos e 111 escanos, e Sumar manteríase como cuarta forza política co 12,8 % en intención de voto e 35 asentos.
Na enquisa electoral de GAD3 para ABC sería Vox quen sofre unha maior baixada e poñería en risco a maioría absoluta do bloque da dereita ao quedar co 11,5 % dos votos e entre 25 e 39 escanos.
O PP gañaría as eleccións co 36,6 % dos apoios e entre 150 e 154 escanos, o PSOE obtería o 28,4 % e entre 107 e 111 deputados e Sumar sería nesta sondaxe a terceira forza co 12,64 % e entre 30 e 34 asentos, co que o bloque da esquerda achegaríase aos 175 cos nacionalistas.
O estudo de IMOP-INSIGHTS para El Confidencial mantería o PP como a forza máis votada, cunha estimación do 32,6 % do voto e 132-135 escanos, e lograría a maioría absoluta con Vox.
En segunda posición aparecería o PSOE (26,2 % e 97-100 escanos), terceiro quedaría Vox (15,3 % e 44-47 escanos) e en cuarta posición estaría Sumar, cun 13,3 % e 35-37 escanos.
