España asoballa a Alemaña e métese na semifinal do Eurobasket feminino
España asoballa a Alemaña e métese na semifinal do Eurobasket feminino
Partidazo do equipo de Miguel Méndez (67-42) que se enfrontará a Hungría nas semifinais
As galegas Raquel Carrera (7 puntos) e Paula Ginzo (4 puntos) estiveron ben dentro dun triunfo moi coral
A selección española feminina completou o mellor partido do Eurobásket no día decisivo. Nos cuartos de final pasáronlle por riba de Alemaña (67-42), metéronse nas semifinais do campionato e garantiron a súa presenza no Preolímpico, outro dos grandes obxectivos desta cita.
Apareceran dúbidas logo da derrota contra Letonia na primeira fase pero co paso dos partidos o equipo do galego Miguel Méndez vai sendo cada vez unha máquina mellor engraxada. Dentro do bo partido grupal destacou Laura Gil con 13 puntos e 11 rebotes. As ourensás Raquel Carrera (7 puntos) e Paula Ginzo (4 puntos) estiveron ao nivel das compañeiras cunha destacada actuación.
A forte saída no primeiro cuarto (20-7) marcou o partido. A defensa foi magnífica e ao descanso o resultado era de 33-16. No segundo tempo a vantaxe aumentou ata situarse por riba dos trinta puntos e só ao final a relaxación propiciou que o resultado non fose de escándalo.
Hungría será a rival de España nas semifinais, ás que chegan coa moral moi alta.
