Estes son os festivos nacionais e autonómicos do 2024

O calendario laboral de 2024 recolle un total de 12 días festivos nacionais, 9 celebrados de forma conxunta en toda España, o mesmo número que o ano pasado segundo unha resolución da Dirección Xeral de Traballo publicada este venres no BOE.

No 2024, será día de festa en toda España:

• luns 1 de xaneiro (Aninovo).

• sábado 6 de xaneiro (Epifanía do Señor).

• venres 29 de marzo (Venres Santo).

• mércores 1 de maio (Festa do Traballo).

• xoves 15 de agosto (Asunción da Virxe).

• sábado 12 de outubro (Festa Nacional de España).

• venres 1 de novembro (Todos os Santos).

• venres 6 de decembro (Día da Constitución Española).

• mércores 25 de decembro (Natividade do Señor).

O xoves 28 de marzo (Xoves Santo), será día de descanso en toda España, agás na Comunidade Valenciana e Cataluña. 

Festivos en Galicia

Entre as celebracións autonómicas, atópase o venres 17 de maio (Día das Letras Galegas) e o xoves 25 de xullo (Santiago Apóstolo), que será festa en Galicia, así como tamén en Cantabria, Madrid, Navarra e País Vasco. Faltaría sumar a este calendario de festividades locais do 2024, para chegar a contabilizar un total de 16 días de celebración anuais.

Fins de semana longas

Botaranse en falta as pontes, pero será un ano con fins de semana máis longas do habitual. A celebración de varias festas en luns ou venres pegados a sábados e domingos permitirá desfrutar de maior tempo de descanso. Este é o caso do luns 1 de xaneiro, o venres 1 de novembro e o venres 6 de decembro.

Nas autonomías que celebran o Xoves Santo, que son case todas, haberá unha ponte de catro días. Ademais, aqueles traballadores que se poidan permitir coller algún día libre, poderán alongar a fin de semana pola celebración da Asunción da Virxe, o xoves 15 de agosto.