Mariupol cae en mans rusas tras a saída dos últimos defensores de Azvostal

Ucraína deu por concluída a defensa da acería de  Azovstal e, con iso, de toda a cidade de Mariupol, no sueste do país. Rusia di que os soldados ucraínos rendéronse e agora son prisioneiros de guerra. A batalla nesta cidade finalizou.

Pasaron 83 días desde que Rusia iniciou a invasión a Ucraína, un período no que Azovstal se converteu en símbolo da resistencia. O pasado 11 de maio o alcalde de Mariupol,  Vadym Boichenko, asegurou que 20.000 civís puideron morrer na cidade desde o comezo da guerra, o 24 de febreiro. 

O Estado Maior do Exército de Ucraína dixo que os soldados que resistiron ás forzas militares rusas na siderurxia de Azovstal cumpriran a súa misión, tras lograr evacuar da zona a máis de 200 militares.

Rusia, polo seu lado, cifrou en 265 os soldados ucraínos evacuados este luns da siderurxia de Azovstal, incluídos 51 gravemente feridos, que, tras "depoñer as armas e renderse", agora son "prisioneiros" de guerra, segundo o Ministerio de Defensa. 

O complexo metalúrxico era o único enclave da estratéxica cidade portuaria de Mariupol que aínda controlaba o exército ucraíno. O resto da cidade foi tomada polo exército ruso o pasado 22 de abril.

Situada nunha área industrial a beiras do mar de  Azov, a súa extensa rede de búnkeres e túneles foron durante semanas refuxios para centos de civís e soldados.