Extirpan por vez primeira en España un tumor cardíaco a un bebé prematuro
Extirpan por vez primeira en España un tumor cardíaco a un bebé prematuro
Provocaron o nacemento da nena ás 28 semanas de xestación para ser tratada
A nena podía morrer nada máis cortar o cordón umbilical, polo que primeiro tiveron que estabilizala
O equipo médico que levou a cabo a intervención é do hospital valenciano La Fe
Nunca antes se realizara en España unha operación deste tipo a un bebé tan pequeno.
Na semana 24 de xestación, aos cinco meses e medio de embarazo, diagnosticáronlle un teratoma pericárdico, un tumor cardíaco pouco frecuente que se comportou de maneira agresiva.
"O tumor seguiu medrando, e con 28 semanas de idade xestacional decidiuse rematar a xestación para continuar o tratamento", di Raquel Escrig, do Servizo de Neonatoloxía do hospital La Fe.
Naceu mediante cesárea e pesou 900 gramos. O tipo de tumor aínda complicaba máis a situación. A nena podía morrer nada máis cortar o cordón umbilical.
"Tras a cesárea, o bebé mantívose conectado á nai mediante a circulación útero-placentaria, e iso permitiu mantela estable ata que empezou a intervención, que foi inmediata tras o nacemento", explica Sonia Garcés, do Servizo de Anestesioloxía dde reanimación do hospital La Fe.
Para a intervención, foi preciso artellar un operativo de máis de 30 profesionais e horas de ensaio clínico. Dous meses despois, a nena foi sometida a unha nova intervención. Tras dous ciclos de quimioterapia, está libre da enfermidade. Todo un fito, apuntan desde o hospital valenciano, porque na literatura científica hai moi poucos casos de nenos que con tan pouco peso sobreviviran sen secuelas a este tipo de tumores.
