Feijóo designa a Miguel Tellado como novo voceiro do PP no Congreso
Feijóo designa a Miguel Tellado como novo voceiro do PP no Congreso
O Partido Popular destaca a "ampla experiencia política" de Tellado, colaborador próximo de Feijóo
![](https://img-g24-crtvg.flumotion.com/prog24/2022/20220518/feijoo_tellado_180522.png)
O líder do PP, Alberto Núñez Feijóo, elixiu a Miguel Tellado, como novo portavoz do PP no Congreso en substitución de Cuca Gamarra, segundo informaron fontes do partido nunha mensaxe aos medios.
A formación anunciou ademais que Carmen Fúnez, ata o de agora vicesecretaria de Políticas Sociais e Reto Demográfico, substituirá a Tellado como vicesecretaria de Organización Territorial do PP, un posto clave no organigrama do partido que, coa secretaría xeral, controla a vida orgánica.
O PP non revelou polo momento se seguirá existindo unha Coordinación Xeral, agora en mans do andaluz Elías Bendodo, cando a expectativa de diferentes dirixentes é deixar atrás a tricefalia que representaban Gamarra como secretaria xeral, Bendodo como coordinador, e Tellado como vicesecretario de Organización.
O PP destaca de Tellado, nado en Ferrol en 1974, que é licenciado en Ciencias Políticas, foi secretario xeral do PP galego entre 2016 e 2022 e director das dúas últimas campañas en Galicia de Feijóo, polo que ten "unha ampla experiencia política".
"A vida parlamentaria terá moita relevancia nesta lexislatura, a primeira na que o primeiro partido de España, o que gañou as eleccións xerais o pasado 23 de xullo, non presida o Goberno da nación", agregaron fontes da formación.
Despexada a incógnita do Congreso, Feijóo debe revelar agora quen será a voz dos populares no Senado, onde este partido ten maioría absoluta.