Fontoira, a tipografía meca que se está a converter nun selo de identidade do Grove

No Día das Letras Galegas imos falarlles precisamente dun tipo de letra con selo galego ou, máis ben, con estilo meco. Chámase Fontoira e está inspirada no estilo tradicional de foliar os barcos nos portos do Grove e Meloxo, obra dun mariñeiro chamado Raúl Fontoira.

Dous amigos da vila decidiron crear unha páxina web con esta tipografía para que quen queira a descargue e a empregue para estampar ou serigrafar o que desexe. Deste xeito queren contribuír a manter este sinal de identidade e patrimonio marítimo.

Nos portos do Grove e Meloxo é doado atopar aínda embarcacións que conservan os folios feitos por Raúl Fontoira, un mariñeiro xubilado que se dedicou a este oficio moitos anos. É unha tipografía moi característica ideada por el e feita totalmente á man, sen patróns.

E para que ese símbolo da cultura marítima non caese no esquecemento, Lino e Rubén, dous amigos do Grove apaixonados polo mundo da tradición mariñeira, crearon Fontoira, unha tipografía inspirada na obra do señor Raúl.

A tipografía pode descargarse desde a páxina Fontoira.gal. As aplicacións son infinitas como explica Lino, desde carteis, a camisetas ou rótulos de establecementos. Fontoira estase a converter xa nun sinal de identidade do Grove.