Conde e Quintana despídense desde o Parlamento

O ata o de agora vicepresidente primeiro e conselleiro de Economía e Industria, Francisco Conde, aproveitou a súa última intervención no Parlamento como membro da Xunta para amosar o seu orgullo por formar parte do Executivo galego.

“Foi unha honra traballar para Galicia durante estes 14 anos”, afirmou Conde, quen cesará como membro do Goberno da Xunta para formar parte das listas do PP ao Congreso, en que liderará a candidatura pola provincia de Lugo, onde concorre como número 1.

No marco da sesión de control ao Goberno, nunha pregunta realizada polo PSdeG, Conde agradeceu aos presidentes da Xunta cos que traballou, Alberto Núñez Feijóo e Alfonso Rueda, a confianza que depositaron nel.

Ese agradecemento quixo facelo extensivo a "toda a cidadanía" pola "oportunidade e pola confianza recibida", así como aos deputados cos que compartiu as sucesivas lexislaturas desde que chegou ao pazo do Hórreo como parlamentario.

Con eles, dixo, puido debater en procura dunha "Galicia mellor, plural e diversa", e dixo que esa será a súa intención nos seguintes plenos que aínda lle restan como deputado no Parlamento. 

Conde manterá a súa acta de deputado ata o final do período de sesións xa que xunto a Rueda e ao outro vicepresidente da Xunta, Diego Calvo, eran os únicos membros do Executivo en ostentar o cargo de deputados autonómicos.

Posteriormente, en declaracións aos medios de comunicación, dixo que está embargado pola "emoción e agradecemento" despois de "moito tempo traballando por Galicia cos diferentes sectores produtivos".

Confesou que o emociona a despedida da comunidade, debido a que "Galicia desde o punto de vista político deumo todo", despois de ser entre 2009 e 2012 asesor do presidente da Xunta e en decembro de 2012 pasar a formar parte do Executivo.

Respecto precisamente ao porvir, Conde agradeceu a Feijóo que "estea a contar comigo nesa posibilidade de traballar nese campo" de política estatal no Congreso dos Deputados.

Adeus de Rosa Quintana

Do mesmo xeito que Francisco Conde, tamén Rosa Quintana se despediu de case 14 anos á fronte da Consellería de Mar, e visiblemente emocionada lembrou o seu traballo a cargo deste departamento que, dixo, sempre realizou "con moita ilusión e moito esforzo" para “facer o mellor posible pola cadea mar-industria”.

Afirmou, como o seu compañeiro, que está moi agradecida ao sector do que "tanto" aprendeu ao longo dos anos.

Ademais, expresou o seu agradecemento a Rueda "polo seu apoio e xenerosidade" ao permitirlle marchar a Madrid co obxectivo de que en todo o Estado "se siga falando de pesca".

Tamén mostrou a súa gratitude con Núñez Feijóo, quen lle ofreceu "novos retos" cos que está "moi ilusionada".

"Tentarei seguir dando de min o mellor a este sector ao que tanto lle quero", resolveu Quintana.