O Sergas amplía o programa de cribado neonatal con tres novas enfermidades
O Sergas amplía o programa de cribado neonatal con tres novas enfermidades
A proba do talón suma tres doenzas máis ás análises
O obxectivo deste cribado é detectar as patoloxías antes de que presenten síntomas para iniciar o tratamento de inmediato
O presidente da Xunta avanzou este xoves que a Xunta incorporará, ao longo do primeiro trimestre deste ano, tres novas patoloxías do cribado neonatal. Tras a reunión do Executivo, Rueda reivindicou que "Galicia xa tiña o cribado neonatal máis completo" de España. Con este novo paso, amplíase ata chegar ás 37 enfermidades analizadas, "fronte ás sete que fixa o Sistema Nacional de Saúde".
O programa galego para a detección precoz de enfermidades xenéticas, endócrinas e metabólicas en período neonatal, vai incorporar tres novas enfermidades: a adrenoleucodistrofia ligada ao cromosoma X (X-ALD), a mucopolisacaridiosis tipo I (MPS I) e a enfermidade de almacenamento de glicóxeno tipo II (Pompe).
O obxectivo deste cribado, a chamada proba do talón, é detectar as patoloxías antes de que presenten síntomas para iniciar o tratamento de inmediato e reducir as consecuencias máis graves ou a mortalidade.
"A atención temperá supón unha diferenza enorme no resto da vida dos nenos e nenas aos que se lles detecta algunha destas patoloxías", sinalou o presidente.
