Os 'trixemelgos milagre' de Vigo chegaron tras un diagnóstico desfavorable ao embarazo

Moi ledos e tamén moi nerviosos pola que lles vén enriba. Pablo, o pai dos 'trixemelgos milagre' que naceron en Vigo, falou con Televisión de Galicia un día despois.

"Dixéronnos que practicamente non podía quedar embarazada e que se o facía ía ser un milagre"

Conta que a nai recupérase moi ben da cesárea e calcula que lle dean a alta na fin de semana. Recupérase ben nun cuarto do Hospital Álvaro Cunqueiro de Vigo, tras o parto múltiple por cesárea o primeiro de marzo.

Eva e Pablo acaban de duplicar a familia porque xa tiñan outro neno de 9 anos que, di Pablo, está entusiasmado cos irmáns. E eles, como están?

"Aínda non o temos asimilado, pero moi contentos. Para min foi unha noticia marabillosa e máis despois do susto que levamos uns meses antes por un aborto e dixéronnos que practicamente non podía quedar embarazada e que se o facía ía ser un milagre", di Pablo García.

Sabela, Xoel e Roi están ben, aínda que ao chegar antes de tempo, un pouco delicados. Os varóns precisaron coidados especiais, como nos conta o pai.

"Estiveron 15 persoas no parto e foi practicamente en media hora. Ela está recuperándose para que lle dean a alta se non é mañá, proximamente. Tiveron que operar un e ao outro facerlle unha técnica para sacarlle aire dun pulmón, pero están evolucionando ben".

Os tres pequenos milagres van revolucionar a vida desta familia chegada de Madrid, de onde é ela, e onde el, vigués, estaba destinado como policía. Souberon do embarazo ao pouco de volver, non hai un ano. Por iso Pablo chancea.

"Non sei se será a auga, o marisco, o clima ou non sei, pero é marabilloso" 

Médicos, familia, amigos e ata o concesionario onde xa cambiaron o seu turismo por un familiar están a entregarse co que necesiten. O rebumbio está xustificado: son os primeiros trixemelgos vigueses desde 2015.