Giráldez fai hoxe un ano de éxitos como adestrador do Celta

Claudio Giráldez fai hoxe mércores un ano á fronte do primeiro equipo do Celta, unha etapa na que o conxunto celeste pasou de pelexar por eludir o descenso a soñar con Europa, cunha decidida aposta pola canteira e un xogo ofensivo que enganchou novamente ao celtismo.

A destitución de Rafa Benítez, o técnico coa peor porcentaxe de vitorias dos últimos 80 anos, e o buraco que provocou nas arcas do club a súa indemnización obrigaron á dirección deportiva a apostar polo técnico do filial nun momento delicado, xa que o Celta unicamente tiña dous puntos de vantaxe sobre a zona de descenso en marzo de 2024.

Avalado polo seu bo traballo no equipo xuvenil e posteriormente no Celta Fortuna, Giráldez mantívose fiel ao seu estilo. Ademais, apostou decididamente polos xogadores da canteira. Baixo a súa dirección, Javi Rodríguez, Alfon, Pablo Durán, Hugo Álvarez, Hugo Sotelo, Sergio Carreira, Damián ou Fer López asentáronse no primeiro equipo.

Nos 37 partidos de Liga que dirixiu o equipo, o técnico galego suma 15 vitorias, 8 empates e 14 derrotas, para un balance de 53 puntos, unha media de 1,43 puntos por partido. Giráldez tamén converteu Balaídos nun fortín. Ata a data, presenta números de equipo europeo con 12 vitorias, catro empates e tres únicas derrotas en 19 partidos. A súa materia pendente segue estando nos partidos a domicilio. No presente campionato ligueiro, só conseguiu gañar no estadio das Palmas.

Outra das grandes virtudes do técnico galego é ter a todos os seus xogadores enchufados. Un dato certifícao: nos 41 partidos oficiais que dirixiu o primeiro equipo (37 en Liga e 4 na Copa do Rei) aínda non repetiu aliñación.