Hamas confirma que continúa o cesamento do fogo en Gaza, así como a liberación de reféns
As autoridades israelís aínda non fixeron declaracións logo de que Netanyahu ameazara con volver á guerra se Hamas non liberaba os cativos antes do sábado
Milicianos de Hamas en Gaza (Reuters/Ramadan Abed)
O grupo islamita Hamas confirmou este xoves a súa disposición de seguir cumprindo co acordo de cesamento do fogo na Franxa de Gaza "en conformidade co asinado", incluído o intercambio de reféns por prisioneiros palestinos previsto para este sábado.
"As conversas caracterizáronse por un espírito positivo e os irmáns mediadores de Exipto e Qatar confirmaron que farán todo o posible para eliminar os obstáculos e pechar as brechas. En consecuencia, Hamas confirma a súa posición de seguir cumprindo o acordo de conformidade co asinado, incluído o intercambio de prisioneiros segundo o calendario especificado", dixo o grupo nun comunicado tras manter conversacións onte no Cairo.
Da mesma forma e segundo confirmaron á Axencia EFE fontes de seguridade exipcias, Hamas continuará coa implantación do cesamento do fogo que mantén con Israel e liberará este sábado tres reféns a cambio de 183 detidos e presos palestinos en cárceres de Israel, tal e como estaba acordado.
O Goberno do primeiro ministro israelí, Benjamin Netanyahu, aínda non fixo ningunha declaración pública, despois de que hai uns días esixira que os reféns fosen liberados o sábado antes do mediodía; recollendo unha declaración ambigua do presidente dos Estados Unidos, Donald Trump, na que non quedaba claro se se refería aos nove aínda con vida da primeira fase ou ao total de 76.
O mércores unha delegación de Hamas, encabezada por Jalil Al Haiya, xefe do movemento de Hamas en Gaza e da legación negociadora, mantivo conversacións cos garantes do pacto no Cairo e abordou as "sucesivas violacións israelís", sobre todo no relacionado coa entrada de axuda humanitaria, tendas de campaña e maquinaria pesada á Franxa.
"A delegación do movemento mantivo reunións e estableceu contactos cos responsables das negociacións en Exipto e Catar, así como cos equipos técnicos de traballo dos irmáns mediadores que están a facer un seguimento da aplicación do acordo en todos os seus aspectos", detallou hoxe Hamas.
Fontes de seguridade exipcias aseguraron que "os mediadores obtiveron garantías dos EUA para meterlle presión a Israel para que acepte a aplicación do protocolo humanitario de forma integral, que inclúe a entrega das tendas e vivendas prefabricadas acordadas, así como deter os ataques de soldados israelís a quen regresa ao norte de Gaza".
Segundo fontes palestinas, uns 150 camións cargados con tendas de campaña entraron onte á noite na zona do norte da Franxa de Gaza a través do paso fronteirizo de Zikim.
Segundo indicaron fontes exipcias, nas reunións con Hamas insistiuse en pedir ao grupo islamita que se "absteña" de dar pasos que "Israel poida interpretar como provocacións", e que os seus comentarios queden "lonxe" de alimentar disputas cos israelís.
Nese sentido, tamén se reafirmou nestes diálogos no Cairo con Hamas que tanto Exipto como Xordania rexeitan categoricamente a proposta do presidente estadounidense, Donald Trump, de expulsar aos gazatís a países veciños, e que os gobernos destes dous países "continuarán os seus esforzos de cooperación con outros Estados árabes e europeos para eliminar por completo esa idea".
A limpeza étnica, entendida como a expulsión forzosa dun grupo étnico dun territorio, constitúe un crime de lesa humanidade e podería considerarse un delito de xenocidio, segundo Nacións Unidas.
