Hamas viaxa ao Cairo con "espírito positivo" para estudar a proposta de tregua

Representantes do grupo palestino Hamas viaxan este sábado ao Cairo co obxectivo de continuar as negociacións con "espírito positivo" para alcanzar unha posible tregua con Israel, confirmou a organización islamita nun comunicado.

"Facendo fincapé no espírito positivo co que os dirixentes do movemento abordaron o exame da proposta de cesamento do fogo que recibiron recentemente, imos ir ao Cairo co mesmo espírito para chegar a un acordo".

O texto insiste tamén na determinación, tanto de Hamas como das "forzas de resistencia palestinas" de madurar o acordo para conseguir as "demandas do noso pobo".

As esixencias que cita son: "deter por completo a agresión, a retirada das forzas de ocupación, o regreso dos desprazados e o alivio do noso pobo, o inicio da reconstrución e a conclusión dun acordo de intercambio serio".

Hamas adiantou que podería ofrecer unha resposta a principios da semana que vén, incluso este domingo.

Ameaza de Israel

Pola súa banda, Israel ameazou o grupo islamita con iniciar a invasión terrestre de Rafah, onde viven 1,4 millóns de persoas amoreadas, se tarda en dar unha resposta ou se rexeita o acordo.

Un dos puntos máis controvertidos é a demanda dun fin completo da ofensiva israelí, que rexeitan os socios de Goberno máis radicais do primeiro ministro, Benjamín Netanyahu, que ameazaron con abandonar o Executivo no caso dun cesamento do fogo permanente.

O propio Netanyahu insistiu en que a guerra continuará ata que se logren todos os seus obxectivos que son acabar con Hamas na Franxa de Gaza e recuperar as persoas retidas que aínda permanecen en mans do grupo.