Investigan un home por romper os retrovisores de dez vehículos en Oleiros

A Garda Civil de Oleiros investiga un veciño da localidade de Mera como presunto autor de nove delitos de danos, relacionados cunha serie de incidentes ocorridos durante o pasado mes de marzo en Oleiros.

Nestes sucesos, tal e como recolle o comunicado, un total de dez vehículos sufriron a rotura dos seus espellos retrovisores.

A investigación iniciouse por mor das diversas denuncias presentadas polos propietarios dos vehículos afectados.

Unha testemuña presencial observou o pasado 16 de marzo ao sospeitoso golpeando varios vehículos coas súas muletas e alertou de inmediato á Policía Local, que puido identificar o home pouco despois dos feitos.

Un elemento crucial para o avance da investigación foi o achado no lugar dos incidentes dunha peza dunha muleta rota. Esta peza coincidiu posteriormente cunha das muletas pertencentes ao home identificado.

Após as dilixencias practicadas, a Garda Civil procedeu á investigación do presunto autor, quen finalmente recoñeceu a súa implicación nos danos ocasionados aos vehículos durante a xornada do 16 de marzo.

As dilixencias instruídas pola Garda Civil foron remitidas ao Xulgado de Garda da Coruña.