Israel lanza un ataque limitado con drons contra Irán

Israel lanzou presuntamente a madrugada deste venres varios mísiles contra Irán na provincia de Isfahán. Pero Irán negou o ataque: primeiro dixo que as defensas antiaéreas derrubaran varios drons e logo sinalou que foron "varios obxectos voadores".

Pola súa banda, fontes anónimas citadas polo diario Jerusalem Post afirmaron que o ataque deste venres debe ser interpretado como unha advertencia a Teherán sobre as capacidades ofensivas israelís e como un sinal de que Israel non busca unha guerra rexional. "Esta vez decidimos non atacar as súas instalacións nucleares, pero podería ser peor'", aseguraron as fontes ao xornal.

Ata o momento, nin o goberno israelí nin o Pentágono recoñeceron oficialmente a operación. Irán activou os seus defensas e só afirmou que se produciron explosións na cidade de Isfahan, pero que as instalacións nucleares iranianas estaban seguras. 

O Exército iraniano deu a entender que non responderá o ataque con drons que sufriu onte á noite e que non causou danos.“Grazas á nosa vixilancia, disparouse a obxectos voadores”, dixo o comandante en xefe do Exército de Irán, o xeneral de división Abdul Rahim Musavi, á axencia iraniana Defa Press, especializada en defensa.

Ante a pregunta de se Irán responderá á agresión, Musavi afirmou: “Xa se viu a resposta de Irán”, nunha aparente alusión ao ataque do pasado sábado a Israel.

Desde Xenebra, a Oficina da ONU para os Dereitos Humanos pediu este venres a Israel e Irán esforzos para reducir as tensións nun momento "extremadamente precario" en Oriente Medio, despois de presuntos ataques israelís en chan iraniano.

E, nesta liña, a presidenta da Comisión Europea (CE), Ursula von der Leyen, pediu "a todas as partes" que freen a escalada de violencia en Oriente Medio.

A China uniuse a esta idea ao declarar a súa oposición a "calquera acción que provoque unha escalada" da crise en Oriente Medio, segundo o portavoz de Exteriores Lin Jian, quen agregou que o seu país "seguirá desempeñando un papel construtivo" para rebaixar a tensión.

Os ministros de Exteriores do G7 están reunidos na illa italiana de Capri, onde tamén se analiza a situación en Oriente Medio.O G7 vai levar a cabo "un esforzo diplomático para a desescalada" da crise, dixo o titular de Exteriores italiano, Antonio Tajani: "Esiximos que se deteña, veremos se somos convincentes"

E entre os países árabes Exipto expresou este venres a súa "profunda preocupación" pola situación e pediu que as partes exerzan "autocontrol máximo" para evitar a extensión do conflito en Oriente Medio.

Como se foron producindo os acontecementos: 

-Israel lanzou a madrugada deste venres varios mísiles contra Irán na provincia de Isfahán en represalia polo ataque sufrido o pasado sábado, segundo medios estadounidenses. 

-A televisión estatal iraniana informou primeiro o son de “fortes explosións” na provincia central de Isfahan, que atribuíu á derriba de drons por parte das defensas aéreas do país. En Isfahan está Natanz, a zona onde está situada unha das instalacións nucleares de Irán. 

-Máis tarde Irán negou que se producise un ataque con mísiles contra o país e asegurou que as defensas aéreas derrubaron varios drons: “Ata o momento non se informou de ningún impacto ou explosión a grande escala causado por ningunha ameaza aérea”, afirmou a axencia estatal IRNA.

-A televisión estatal iraniana proporcionou unha información similar e mostrou imaxes de aparente normalidade na cidade de Isfahan. “As instalacións nucleares na provincia de Isfahan están completamente seguras”, indicou a axencia Tasnim, vinculada coa Garda Revolucionaria, o corpo ao cargo da seguridade dos centros atómicos do país. 

-Os Estados Unidos dixeron que non estiveron involucrados no ataque e, ademais, Israel notificou a Washington antes de levalo a cabo, segundo dixo un alto funcionario á cadea NBC.

 -A axencia estatal IRNA informou nun principio de que se activaron as defensas aéreas en “varias provincias”, despois de que se escoitaran “fortes explosións” no centro do país

-No medio da confusión sobre o que está a suceder, as autoridades de aviación suspenderon os voos en polo menos tres cidades do país, entre elas Teherán e o seu aeroporto internacional. 

-Pero horas mais tarde Irán reabriu os aeroportos, entre eles, os dous aeródromos da capital

- O Organismo Internacional de Enerxía Atómica (OIEA) confirmou este venres que non se produciron danos nas instalacións nucleares de Irán tras o ataque realizado por Israel contra o centro do país.