Hamás di estar "aberto a discutir" un acordo que inclúa a fin da guerra en Gaza
Hamás di estar "aberto a discutir" un acordo que inclúa a fin da guerra en Gaza
O grupo islamita reuniuse no Cairo con mediadores exipcios e responsables de Fatah para abordar unha posible tregua
Unha casa destruída en Nuseirat polas bombas israelís. REUTERS/Ramadan Abed
A dirección da organización islamita Hamás di estar "aberta a discutir calquera idea e proposta" con Israel de intercambio de reféns por presos palestinos "sempre que haxa garantías internacionais que inclúan a fin da guerra e a protección do pobo palestino" na Franxa de Gaza.
Segundo o xornal árabe Asharq Al-Awsat, o grupo palestino reitera as súas tres condicións principais para asinamento dun acordo co Goberno israelí: a retirada gradual das tropas no enclave, o retorno dos desprazados aos seus fogares e o aumento da entrada de axuda humanitaria.
O Goberno de Benjamín Netanyahu -especialmente o sector máis ultraconservador- nestes últimos meses amosou o seu rexeitamento para aceptar a maioría desas demandas, pero sobre todo a retirada total das súas tropas.
Con todo, a chegada do acordo de cesamento do fogo entre Israel e O Líbano, que entrou en vigor este 27 de novembro, abriu unha nova porta a retomar as negociacións en Gaza tras meses de bloqueo.
Este sábado unha delegación do grupo islamita chegou ao Cairo para reunirse cos mediadores exipcios e responsables do movemento secular palestino Fatah e abordar "cuestións relacionadas" cunha tregua en Gaza, informaron fontes próximas ás conversas.
De acordo cos informantes, que pediron manter o anonimato pola sensibilidade do asunto, a delegación de Hamás está encabezada polo xefe en funcións do movemento islamita en Gaza, Jalil al Hayya, para discutir tamén un posible acordo de intercambio.
A milicia palestina publicou, de feito, este sábado un vídeo do cativo Edan Alexander, refén na Franxa de Gaza desde hai máis de 420 días, no que lle pide ao primeiro ministro israelí, Benjamín Netanyahu, que os saque do enclave.
Hai xusto unha semana Hamás tamén anunciou a morte doutra refén retida no norte do enclave por ataques israelís. O Exército hebreo, pola súa banda, dixo non poder verificar a veracidade destas informacións.
Das 251 persoas secuestradas no ataque de Hamás a Israel do 7 de outubro de 2023 (no que tamén morreron 1.200 persoas), quedan no enclave 97 cativos -a metade xa mortos-. Hai outros catro reféns desde hai anos, entre eles dous soldados mortos.
