Israel bombardea o sur de Beirut minutos despois dunha orde de evacuación

O Exército xudeu bombardeou, polo menos en catro ocasións, as inmediacións dun edificio situado nos suburbios do sur de Beirut, coñecidos como o Dahye, apenas media hora despois de que emitira unha orde de evacuación para os residentes da zona.

A Axencia Nacional de Noticias libanesa (ANN) dixo que, nun principio, Israel efectuou tres bombardeos "de advertencia" no barrio de Al Yamous, onde momentos antes se producira "un gran desprazamento" de xente para poñerse a salvo.

Pouco despois, os avións de combate hebreos lanzaron "un violento ataque" con tres proxectís na mesma zona, o que provocou a destrución dun almacén e "danos en varios edificios e automóbiles", dixo a ANN sen achegar máis detalles.

Os bombardeos producíronse minutos despois de que o Exército israelí ordenara evacuar un edificio no Dahye, unha das zonas máis azoutadas polos ataques aéreos de Israel durante a guerra do ano pasado contra Hezbollah.

Bombardeos no outono

A aviación israelí bombardeou intensamente o Dahye en setembro, outubro e novembro do ano pasado, nunha escalada contra o grupo xiíta libanés na que eliminou a súa cúpula, incluído o que fora o líder durante décadas, Hasán Nasrala.

Desde entón, malia que os ataques se volveron menos frecuentes tras a firma dun cesamento do fogo co Líbano en novembro do ano pasado, Israel volveu bombardear a zona ocasionalmente argumentando que o grupo xiíta está a tratar de restablecer a súa presenza.

As forzas israelís xa atacaron os suburbios do sur de Beirut a comezos de abril, nunha acción na que polo menos morreron catro persoas.

Israel defende os ataques

O primeiro ministro de Israel, Benjamín Netanyahu, e o seu ministro de Defensa, Israel Katz, defenderon os ataques contra o edificio porque segundo o Exército hebreo albergaba unhas instalacións do grupo xiíta.

"Israel non permitirá que Hezbollah se reforce e supoña unha ameaza en ningún lugar do Líbano", aseguraron ambos os dous nun comunicado conxunto.

Ademais, consideraron o Goberno libanés "directamente responsable" de previr o restablecemento do grupo no país.

Segundo a mensaxe, compartida pola oficina do mandatario israelí, o edificio atacado almacenaba "mísiles de precisión", que supoñían "unha ameaza significativa para o Estado de Israel".