Israel confirma que non se vai do Líbano e que manterá tropas en cinco puntos fronteirizos

O ministro israelí de Defensa Israel Katz anunciou este martes que o exército permanecerá en cinco puntos próximos á fronteira na zona de amortecemento do Líbano, a pesar de que hoxe se cumpría o prazo para que Israel retirase as súas forzas do sur do país, segundo o estipulado no acordo de cesamento do fogo.

"A partir de hoxe, o exército permanecerá na zona de amortecemento no Líbano controlando cinco postos de avanzada e continuará vixiando, con forza e sen concesións, calquera violación (do acordo) por parte de Hezbollah", dixo Katz nun comunicado.

"Hezbollah debe retirarse completamente máis aló da liña (do río) Litani e o exército libanés debe facelo cumprir e desarmar a súa presenza baixo a supervisión do mecanismo establecido baixo o liderado dos EUA", engadiu Katz. Ademais, Katz dixo tamén reforzar a presenza de tropas no lado israelí, ao longo da fronteira entre ambos os países, a fin de garantir a seguridade das comunidades do norte.

O pasado 27 de novembro entrou en vigor un cesamento de hostilidades, inicialmente previsto cunha duración de 60 días, que prevía a retirada das forzas israelís presentes no territorio libanés e limitar a posesión de armas na franxa fronteiriza en mans das forzas de seguridade libanesas. Onte, o Goberno libanés reiterou o seu compromiso co cumprimento íntegro da resolución 1701, que puxo fin á guerra líbano-israelí de 2006 e sobre a que se basea o novo cesamento do fogo, que estipula o desarmamento de Hezbollah e que o Estado libanés monopolice as armas en todo o país. O texto pide ademais o desmantelamento das instalacións non estatais para a produción de armas e tamén prohibe a ambos os bandos realizar ataques contra o outro, algo que Israel non respectou alegando o seu dereito á "autodefensa".

O cesamento do fogo inicial venceu o 26 de xaneiro, unha xornada especialmente sanguenta na que polo menos 24 persoas morreron e outras 120 foron feridas despois de que os residentes do sur tratasen de regresar ás súas localidades ocupadas. Ao día seguinte, Estados Unidos anunciou unha prórroga do cesamento de hostilidades ata o 18 de febreiro para que as partes tivesen máis tempo de cumprir coas súas obrigacións, e hoxe Israel de novo dixo que non vai abandonar o país tras a invasión terrestre iniciada o pasado 1 de outubro.