Israel segue a minguar as filas de Hezbollah mentres no Iemen contraataca os hutíes

Israel volveu atacar este domingo o sur e o leste do Líbano, provocando 53 vítimas mortais, e os suburbios meridionais de Beirut. Os bombardeos dos últimos días cobráronse máis dun milleiro de vidas.

Ademais, ampliou o radio de loita cun novo bombardeo contra a cidade iemení de Al Hodeida, no que morreron polo menos catro persoas e outras 40 quedaron feridas, segundo un balance preliminar.

O Exército hebreo tamén confirmou a morte dunha vintena de membros de "diverso rango" de Hezbollah, entre eles o comandante Ali Karaki, no bombardeo masivo no que faleceu o seu máximo líder, Hasan Hasrallah.

"Estas mortes non significan o final de Hezbollah porque está moi arraigado á sociedade libanesa, pero si que nos permite empuxalos cara ao norte do Líbano e así poder crear as condicións para que os residentes evacuados poidan regresar ás súas casas", explicou o portavoz castrense, Roni Kaplan.

Por iso, segundo apuntou este sábado o ministro de Defensa, Yoav Gallant, o corpo militar está a estudar unha "expansión das actividades" na fronte norte, que poderían ter a forma dunha invasión terrestre, segundo a prensa hebrea, aínda que de carácter moi limitado.

Ataque contra os hutíes

No medio da escalada co Líbano, Israel tamén bombardeou este domingo "a grande escala" a cidade portuaria de Al Hodeida, no oeste do Iemen, e causou polo menos catro persoas mortas e 40 feridas, segundo dixo o portavoz do Ministerio de Saúde hutí, Anees al Asbahi.

Este ataque prodúcese un día despois de que os rebeldes lanzaran un mísil balístico contra o aeroporto israelí de Tel Aviv, onde Netanyahu debía aterrar da súa viaxe á Asemblea da ONU, en Nova York. Segundo o Exército xudeu, foi interceptado fóra das fronteiras do país.

Nun comunicado, os hutíes aseguran que este tipo de ataques van continuar ata que "a agresión contra Gaza e O Líbano se deteña", mantendo así o seu apoio como parte do denominado "Eixo da Resistencia", liderado por Irán, mesmo tras o asasinato de Nasrallah.

As tropas hebreas aseguran nun comunicado que están decididas a "seguir actuando e danando a todo aquel que supoña unha ameaza para a cidadanía Israel e á distancia que sexa necesaria", acusou o texto, en referencia aos 1.800 quilómetros que separan Israel do Iemen.