Jair Bolsonaro nega calquera responsabilidade
Jair Bolsonaro nega calquera responsabilidade
O expresidente ultradereitista rexeita as acusacións do actual mandatario
Di que o vandalismo e as invasións de edificios públicos están fóra da democracia, "como as practicadas pola esquerda en 2013 e en 2017"
A Policía Civil de Brasilia eleva a 300 as persoas detidas e anuncia máis arrestos
![Foto de arquivo](https://img-g24-crtvg.flumotion.com/prog24/2023/20230109/BOLSONARO.jpg)
Jair Bolsonaro rexeita calquera responsabilidade na toma das sedes do Congreso, da Presidencia e da Corte Suprema do Brasil por parte de varios milleiros de seguidores seus. Fíxoo desde os Estados Unidos, a onde viaxou pouco antes da toma de posesión do seu sucesor, da que se ausentou.
O exmandatario ultradereitista pronunciouse a través das redes sociais horas despois de que a situación fose controlada polas forzas de seguridade.
- Manifestações pacíficas, na forma da lei, fazem parte da democracia. Contudo, depredações e invasões de prédios públicos como ocorridos no dia de hoje, assim como os praticados pela esquerda em 2013 e 2017, fogem à regra.
— Jair M. Bolsonaro 2️⃣2️⃣ (@jairbolsonaro) January 9, 2023
Lula da Silva, que xa puido ver en Brasilia o regueiro de destrución que deixaron os simpatizantes do seu predecesor, acusouno de alentar os actos golpistas.
Trescentas persoas prendidas
A Policía Civil de Brasilia eleva xa a 300 as persoas detidas e anuncia máis arrestos. Horas antes, o ministro de Xustiza Flávio Dino informaba de que se practicaran arredor de 200 detencións.
Dino explicou que gobernadores doutros estados están cedendo axentes policiais para fortalecer a seguridade do Distrito Federal de Brasilia nos vindeiros días. E dixo que pedirán o uso de tropas das Forzas Armadas como apoio.