José López Campos, sobre o pacto pola lingua: "Todos teremos que deixar algo das nosas posicións para chegar a un acordo"

O conselleiro de Cultura, Lingua e Xuventude da Xunta de Galicia, José López Campos, convocou para o próximo día 24 de outubro os grupos representados no Parlamento de Galicia a unha reunión de traballo co obxecto de "abrir o proceso de diálogo para acordar un gran pacto pola lingua".

"A realidade mudou e a sociedade cambiou moito e o idioma non é alleo a iso, pero se só facemos unha diagnose desde a política estará equivocada, precisamos un novo escenario desde o punto de vista da liberdade lingüística", apuntou López Campos nunha entrevista este mércores no programa Bos días da Televisión de Galicia. 

De cara á convocatoria da mesa de traballo para a consecución dun pacto pola lingua, o conselleiro reiterou a necesidade de "sacar a lingua do debate político e conducila pola senda da negociación e do acordo". Neste sentido, puntualizou que "a confrontación política prexudica a lingua e polariza a sociedade". "Se este pacto pola lingua se mantén no tempo, é bo, porque quererá dicir que ninguén se levanta da mesa de negociación e a partir de aí todos teremos que deixar algo das nosas posicións para chegar a un acordo común".

O informe do IGE

O debate político continúa arredor dos datos publicados polo Instituto Galego de Estatística (IGE), que certifica que a poboación que sempre fala castelán é xa maioritaria e que un terzo de nenos de máis de cinco anos saben falar "pouco ou nada" na lingua oficial.

A teor do informe do IGE, López Campos remarcou a oportunidade de poñer en marcha políticas de contacto coa lingua e coa cultura para "as máis de 130.000 persoas que retornaron nos últimos 5 anos".

"A enquisa acredita que as competencias se aprenden no ensino, e iso quere dicir que o decreto do galego funciona [...]; perdemos influencia nas familias, pero garantimos o ámbito escolar, polo que temos que mellorar o uso social do galego".

O titular de Cultura e Lingua da Xunta lembrou a posta en marcha da campaña "Saca a lingua que levas dentro" e do novo Plan de 50 medidas para dinamizar o uso do galego, políticas lingüísticas centradas nos neofalantes e nas persoas non nadas en Galicia para incrementar o prestixio e o uso do idioma, tamén entre a xente nova e nas redes sociais.