Gestal pide prudencia nas vacacións, pero cre que os contaxios baixarán en xullo
Gestal pide prudencia nas vacacións, pero cre que os contaxios baixarán en xullo
O catedrático emérito da USC admite que o virus se está a transmitir con facilidade
Lembra que as infeccións son leves agás nos maiores e persoas vulnerables
Juan Gestal, catedrático emérito de Medicina Preventiva e Saúde Pública da universidade de Santiago (USC), non quere falar de sétima vaga porque cre que agora estamos nunha situación epidemiolóxica moi distinta.
"Do 22 de abril ata o 15 de maio tiemos incidencias superiores a esta, non temos unha sobrecarga do sistema sanitario, está todo funcionando ben, estamos convivindo co virus".
Admite que as subvariantes da ómicrom son moi contaxiosas e burlan facilmente a inmunidade das vacinas, pero non se están rexistrando casos graves. Lembra que as persoas maiores seguen sendo as máis vulnerables. Por iso pide prudencia para evitar os contaxios, e tamén as reinfeccións que se están detectando.
"Ao mellor a mediados de xullo pode estar diminuíndo, pero todo depende dos contactos interpersoais, agora hai festivais e todo iso; tamén da sublinaxe BA4 e BA5 que ten moita responsabilidade neste aumento".
Cre que a Axencia Europea do Medicamento aprobará en setembro novas vacinas que servirán para administrar a cuarta dose a maiores de 80 anos e persoas vulnerables.
Descarta que esa cuarta dose se deba administrar a toda a poboación e fai un chamamento ás persoas que non se vacinaron para que o fagan. Asegura que en Galicia o 40 % da poboación de 20 a 29 anos non ten a dose de reforzo.
