Kevin Vázquez dille adeus ao Celta, o club de toda a súa vida
Kevin Vázquez dille adeus ao Celta, o club de toda a súa vida
Asina co Spórting de Rubén Albés para as vindeiras dúas temporadas
O destino do xogador de Nigrán Kevin Vázquez é o Spórting de Xixón. Kevin foi un dos descartes de Claudio Giráldez e o lateral dereito enrólase nun club dirixido por outro adestrador con pasado no club vigués como é Rubén Albés. O adestrador tívoo ás súas ordes na temporada 17-18 e coñece ben a capacidade e a entrega en cada partido e adestramento do galego.
Ía camiño de ser xogador dun só club. Con traballo pasou por todas as categorías inferiores ata que chegou ao Celta B co que debutou cando aínda era xuvenil. Durante cinco temporadas foi indiscutible nese lateral esquerdo de Barreiro, coincidindo con grandes xeracións de futbolistas. Algúns pasaron ao primeiro equipo pero, pasaban os anos, e Kevin non conseguía dar o salto.
En 2018, con 24 anos, conseguiu o premio á insistencia. A ficha co primeiro equipo. Nunca se fixo co posto como titular, pero sempre que se requiriu dos seus servizos cumpriu amplamente. Máis de oitenta partidos co primeiro equipo do Celta, o club da súa vida, ao que lle di adeus Kevin Vázquez Comesaña.
