A capital ucraína resiste mentres Rusia intensifica os ataques en todo o país
Ucraína cifra en case 200 os civís mortos desde o comezo da invasión
Volodímir Zelenski pídelle ao Exército que non perda o control de Kiev
Rusia informa da destrución de 800 obxectivos militares na madrugada
O Exército ucraíno combate nas rúas de Kiev con unidades rusas, que estarían a bombardear unha gornición militar no oeste da capital do país. Segundo o Exército de Terra, a incursión inimiga está a ser rexeitada.
De acordo coas mesmas fontes, unha columna rusa, integrada por tanques, camións e outros vehículos militares, tentou avanzar na zona do metro Berestéiskaya, na avenida da Vitoria. É a liña que conduce ao corazón desta cidade de tres millóns de habitantes.
Segundo as autoridades ucraínas, as forzas aerotransportables rusas aterraron nun aeródromo na localidade de Vasilkov, que se atopa a menos de 40 quilómetros de Kiev.
En Kiev escoitáronse explosións que se deben, segundo as autoridades locais, ao ataque ruso dunha central térmica de Troieshchyna, no norte da capital, a máis potente de Ucraína.
A alcaldía de Kiev recoméndalle á poboación que non saia á rúa, nin se asome ás xanelas ou balcóns dos edificios.
"Nas rúas da nosa cidade teñen lugar nestes momentos intensas accións militares. Manteñan a calma e sexan moi precavidos", informou o Concello nun comunicado.
As alarmas antiaéreas soaron na cidade para pedirlle á cidadanía que se meta nos refuxios. O Pentágono dixo este venres ter "claros indicios" de que as forzas armadas de Ucraína están a lograr defenderse e que Rusia non está a avanzar como agardaba tras sufrir "retrocesos" nos seus plans.
Mensaxe de Zelenski
O presidente de Ucraína, Volodímir Zelenski, nunha mensaxe á nación esta madrugada, pediu ao Exército que non perda o control da capital. Segundo dixo, o destino de Ucraína está a decidirse agora mesmo e asegurou que o seu principal obxectivo "é poñer fin a este masacre".
O Goberno dos Estados Unidos está preparado para axudar o presidente ucraíno a escapar de Kiev para evitar ser capturado ou asasinado polas forzas rusas. Pero Zelenski nega unha eventual evacuación. Tamén desmente que lle ordenara ao Exército depoñer as armas ante o avance da ofensiva rusa sobre a capital.
"Agora na rede apareceu moita información falsa de que eu ordenei depoñer as armas e de que ten lugar unha evacuación. Eu estou aquí e non estamos a depoñer ningunha arma", dixo Zelenski nunha intervención gravada en vídeo.
Volodímir Zelensky nega unha eventual evacuación
Parte de guerra ruso
No parte matutino de guerra, as Forzas Armadas de Rusia informan da destrución durante a madrugada do sábado de máis de 800 obxectivos militares ucraínos con mísiles de cruceiro.
"Durante a noite as Forzas Armadas de Rusia (...) destruíron con mísiles de cruceiro terrestres e navais (...) 14 aeródromos militares, 19 postos de control e comunicacións, 24 sistemas de mísiles antiaéreos S-300 e Osa e 48 estacións de radares, entre outros", informou o portavoz do Ministerio de Defensa ruso, Ígor Konashenkov, ao especificar que se tratou de 821 instalacións.
Ademais, informou da derriba de sete avións, sete helicópteros e nove drons ucraínos, e da aniquilación de oito lanchas de combate.
"Aniquilamos 87 tanques e vehículos blindados, 28 lanzadeiras múltiples e 118 vehículos e equipos militares", engadiu.
Segundo Konashenkov, as forzas rusas tomaron a cidade de Melitópol, situada no sur de Ucraína, onde "toman todas as medidas para garantir a seguridade da poboación civil e evitar provocacións dos servizos de intelixencia ucraínos e os nacionalistas".
En particular, acusounos de aplicar a estratexia de "terra arrasada" e destruír nas súas retiradas subestacións eléctricas e pontes. O portavoz de Defensa destacou o avance das milicias separatistas de Lugansk e Donetsk, que contan co apoio militar ruso.
Segundo Konashenkov, os milicianos da autoproclamada república de Lugansk avanzaron 30 quilómetros desde o inicio da operación rusa e controlan as localidades de Bajmútovka e Grechishkino, mentres que as milicias de Donetsk avanzaron seis quilómetros en dirección ao pobo de Novomáyskoye.
Rusia informa da destrución de máis de 800 obxectivos militares
Parte ucraíno
Pola súa banda, o Ministerio de Defensa de Ucraína afirmou que durante a última xornada as perdas das tropas inimigas aumentaron, ao rexistrar a derriba de 14 avións e 8 helicópteros e a destrución de 102 tanques e 536 blindados.
Segundo a entidade castrense, os rusos terían perdido en combate máis de 3.000 efectivos. Ademais, cifra en case 200 os civís mortos desde o comezo da invasión.
Ucraína asegura que aumentaron as perdas das tropas inimigas
.png)
