Lara Hernández e Carlos Martín son os novos líderes de Sumar co 93 % de apoios

A Asemblea estatal de Sumar elixiu este sábado a secretaria de Organización, Lara Hernández, e o deputado Carlos Martín como novos líderes do partido ao apoiar cun 93 % a lista que ambos encabezan e da que forma parte a vicepresidenta segunda do Goberno, Yolanda Díaz.

Esta lista oficialista foi a única sometida a votación na asemblea celebrada este sábado na localidade madrileña de Rivas Vaciamadrid, xa que a outra alternativa, denominada Sumando por Baleares, non logrou os avais necesarios para ser tomada en consideración.

Coa elección de Lara Hernández e Carlos Martín como novos líderes, Sumar inaugura un novo ciclo e dá por superada a etapa de interinidade que vivía o partido tras a renuncia de Díaz ao seu cargo de coordinadora xeral polos malos resultados da formación nas eleccións europeas de xuño do ano pasado.

Yolanda Díaz xa non é a líder oficial de Sumar pero seguirá tendo un papel moi destacado no partido que ela mesma fundou pouco antes das eleccións xerais de 2023, ao continuar como referente dentro do Goberno de coalición co PSOE.

A vicepresidenta segunda do Goberno figura como número tres no grupo de coordinación de Sumar recentemente elixido, que tamén integran o voceiro e ministro de Cultura, Ernest Urtasun, ou a voceira no Congreso, Verónica Martínez Barbeiro, entre outros.

Os 500 delegados da asemblea, entre eles Díaz, que non acudiu presencialmente a esta primeira xornada, son os encargados de votar os novos órganos estatais de Sumar (coordinación xeral, grupo coordinador e comité de garantías), así como as emendas aos documentos políticos e organizativos. Votaron presencial ou telematicamente os órganos que marcarán o rumbo do partido na nova etapa

O novo documento político de Sumar foi aprobado cun 97 % de apoios e o organizativo cun 95 %, mentres que o comité de garantías estará formado por Inmaculada do Pino, Rosana Chamas, Jorge Fernández Novo, Rafael Ramírez e José Valentín Ramírez.

A vicepresidenta segunda do Goberno e ministra de Traballo estará presente este domingo no acto de clausura da asemblea en Madrid capital, onde pronunciará un discurso.

Sumar defende un entendemento con Podemos

Sumar renuncia nestes documentos a ser un partido paraugas doutras formacións aliadas, con moitas das cales comparte grupo no Congreso (como IU, os comúns, Más Madrid ou Compromís), e ratifica a súa vontade de establecer alianzas electorais con outros partidos, coa posibilidade de celebrar primarias.

A través dunha das emendas aprobadas nos documentos, Sumar comprométese a avanzar na súa política de alianzas para evitar "acordos de última hora tras enfrontamentos públicos", nunha alusión implícita ás desavinzas que houbo con Podemos durante a configuración da lista para as eleccións xerais de 2023.

Sumar está a favor de reducir a dependencia da OTAN

Sumar rexeitou na súa asemblea unha emenda que pedía a saída da OTAN, pero finalmente incorporou outra na que avoga por establecer novas alianzas cos países da Unión Europea en seguridade e defensa "reducindo paulatinamente a dependencia de alianzas con socios como Estados Unidos".

O partido de Yolanda Díaz tamén aprobou unha emenda na que defende unha reforma constitucional para avanzar nun modelo de Estado federal, plurinacional e republicano.