Liberan un ferido atrapado tras unha colisión frontal en Salceda de Caselas

Unha colisión frontal entre dous vehículos obrigou a liberar unha das persoas implicadas, ferida, no concello de Salceda de Caselas.

Segundo informou o 112, os Bombeiros do Porriño encargáronse das tarefas de liberación da vítima, un home que foi trasladado ao centro hospitalario de referencia.

O servizo recibiu a primeira comunicación sobre o accidente ao redor das 8:00 horas, a través dun particular. Pouco despois, un dos implicados tamén se poñía en contacto co Centro Integrado de Atención ás Emerxencias e confirmaba que polo menos unha das persoas era incapaz de abandonar o seu vehículo.

Solicitouse entón a intervención de Urxencias Sanitarias de Galicia-061, dos Bombeiros do Porriño, da Garda Civil de Tráfico, dos voluntarios de Protección Civil de Salceda de Caselas e dos servizos de mantemento da estrada.