Mala xornada na Liga Feminina de baloncesto con tres derrotas

Mala xornada para os tres equipos galegos da Liga Feminina de baloncesto. Todos os partidos con representación galega remataron con derrota. A que máis preto estivo de acadar o triunfo foi o Celta Femxa Zorka, que gozou dunha última xogada para forzar a prórroga ante o Gernika, pero non deu anotado unha tripla (54-57). O partido moveuse en diferenzas pequenas que favoreceron o Celta no primeiro tempo (32-25). No segundo, o Gernika colleu o mando do partido e pareceu sentenciar cunha vantaxe de trece puntos (38-51) que case enxugan as viguesas. 

O Ensino perdeu no Pazo contra o Zaragoza por 66-75. Diante do cuarto clasificado da Liga Feminina o equipo de Antonio Pernas completou un bo encontro pero foi superado no último cuarto. Comezara moi ben (20-8), pero a liña xeral foi a de igualdade. Ao descanso, a vantaxe era visitante por 42-46. Ao comezo do último cuarto, unha tripla do Ensino puxo o 59-60, pero un parcial de 0-9 encamiñou a vitoria do Zaragoza. As luguesas puxéronse a seis (66-72) e posesión, pero non acertaron co lanzamento que as podía deixar con opcións no último minuto. 

O Baxi Ferrol tivo un dos peores días da temporada e perdeu na pista do Cadí la Seu por 73-49. O partido comezou torcido para as ferrolás, cun parcial de 21-0, e tocoulles ir a remolque durante corenta minutos. Ao descanso perdían por un contundente 43-19. No terceiro cuarto chegou unha pequena reacción e puxéronse a catorce puntos (50-36), un espellismo, porque o equipo catalán acabou logrando unha vitoria contundente.