Sunak asume o cargo e avisa dunha "profunda crise" e de "decisións difíciles"

O conservador Rishi Sunak, de 42 anos, converteuse este martes no novo primeiro ministro do Reino Unido, tras ser recibido no palacio de Buckingham polo rei Carlos III, quen lle encomendou formar un Goberno. 

Deste xeito, Carlos III, que ascendeu ao trono tras a morte da súa nai, Isabel II, o pasado 8 de setembro, pedía por primeira vez a un líder británico que forme un novo Goberno.

Tras o encargo do monarca, Sunak desprazouse ao número 10 de Downing Street, desde onde se dirixiu ao pobo británico antes de comezar a exercer como primeiro ministro. 

Nese discurso dixo que a prioridade do seu Goberno será "a estabilidade económica" e devolver a "confianza" ao Reino Unido, pero advertiu de que se achegan "decisións difíciles".

“Quero render homenaxe á miña predecesora: ela non estaba equivocada á hora de querer ter crecemento neste país. É un obxectivo nobre, e admiro a súa determinación para lograr ese cambio, pero cometéronse algúns erros. Non por mala intención, de feito, era todo o contrario, pero, con todo e con iso, eran erros", dixo o novo primeiro ministro sinalando a Liz Truss.

"E eu fun elixido líder do meu partido, e primeiro ministro, para solucionalos. E ese traballo empeza de inmediato. Quero que a estabilidade económica e a confianza estean no centro da axenda deste Goberno. Isto implicará decisións difíciles por vir”, engadiu.

Con todo, dixo que "xuntos podemos lograr cousas incribles. Crearemos un futuro que mereza os sacrificios que fixemos".

Sunak defendeu a súa lexitimidade para ocupar o posto por ser herdeiro do programa co que Boris Johnson gañou as eleccións en 2019. De feito o novo primeiro ministro aproveitou para agradecerlle o seu traballo.

O novo líder británico comprometeuse a seguir aquel programa e aproveitar as oportunidades que deixou o "brexit" e "equilibrar" a economía.

"Son consciente do alto cargo que aceptei e espero estar á altura das súas esixencias. Cando se presenta a oportunidade de servir, non podes cuestionar o momento, só a túa disposición", afirmou.

Sunak engadiu que guiará ao país "cara ao futuro", poñendo o interese nacional "por encima da política".

Jeremy Hunt continuará coa carteira de Economía

 Jeremy Hunt, o ministro de Economía que entrou no Goberno hai apenas dúas semanas para dar marcha atrás aos plans fiscais de Liz Truss, manterá o cargo no Executivo do novo primeiro ministro británico Rishi Sunak.

A permanencia de Hunt á fronte das finanzas do Reino Unido foi o primeiro anuncio que fixo oficial Sunak este martes ao comezar a nomear o seu gabinete, tras recibir o encargo de formar Goberno por parte do rei Carlos III.

Tras as turbulencias que provocou o recorte de impostos de Truss, que presentou a súa dimisión a pasada semana, Sunak recalcou que o seu principal obxectivo será recuperar a "estabilidade económica".

Hunt reuniuse brevemente co xefe de Goberno no número 10 de Dowing Street, a súa residencia oficial, antes de que se fixese público o anuncio da súa continuidade no número 11 da mesma rúa, onde se sitúa o despacho do ministro de Economía.

Espérase que o político conservador manteña os seus plans de comparecer o vindeiro luns na Cámara dos Comúns para debullar o seu plan financeiro a medio prazo.

Mantéñense varios ministros de Truss e Johnson

Ademais de Hunt, Sunak rodeouse de moitos dos ministros que estiveron nos Gobernos de Boris Johnson e Liz Truss, nun intento por unificar a un Partido Conservador profundamente dividido.

Á fronte do ministerio de Exteriores mantivo a James Cleverly, mentres que Ben Wallace queda como ministro de Defensa, un cargo clave ante a guerra en Ucraína, e Suella Braverman volve a Interior, posto do que dimitira durante o mandato de Truss.

O novo líder conservador premiou ao seu compañeiro de filas Dominic Raab, peza fundamental na súa campaña das primarias, ao nomealo viceprimeiro ministro e titular de Xustiza.

Despedida de Liz Truss

Sunak substitúe a Truss á fronte do Executivo, despois de que esta anunciara a súa dimisión o pasado día 20 ante as turbulencias que o seu programa fiscal, con recortes de impostos, provocou nos mercados financeiros.

Truss foi a última primeira ministra do reinado de Isabel II, ao substituír o 6 de setembro a Boris Johnson, dous días antes da morte da entón xefa do Estado.

Debido ao seu delicado estado de saúde, Isabel II pediu a Truss que formase Executivo no castelo escocés de Balmoral.

A aínda primeira ministra acudiu este martes a presentar a súa renuncia a Carlos III no palacio de Buckingham tras manter a súa última reunión do gabinete.

Logo desa xuntanza, Truss falou por uns momentos ante a porta do número 10 de Downing Street, onde dixo que fora "unha grande honra" servir o Reino Unido.

Sunak, de 42 anos e primeiro hindú en ocupar o cargo, antigo ministro británico de Economía, asume o poder no medio dunha crise económica, polo aumento da inflación e os tipos de xuro e unha inminente recesión.