Lugo convértese na cuarta cidade galega máis poboada ao superar os 100.000 habitantes
Na cidade levaban tempo detrás deste reto e agora parece que o conseguiron. As cifras son do padrón municipal e hai que esperar a que as confirme o INE.
A chegada de inmigrantes é o que explica o aumento da poboación, na cidade xa conviven máis dun cento de nacionalidades
Lugo segue gañando poboación e supera xa os 101.000 habitantes. "Tanto medrastes?", pregunta un home, e outra muller asegura: "A ver que di o INE".
As cifras son do padrón municipal, pero hai que esperar polos datos do INE. Aínda que desta vez todo apunta a que a cidade si superou o limiar dos 100.000. Detrás deste aumento está: "Para min, a causa principal é a chegada de xente de fóra", di unha muller.
Na cidade xa conviven más dun cento de nacionalidades e os inmigrantes representan o 10 por cento da poboación. "E vai subir, o Banco de España baralla uns horizontes de aumento da poboación inmigrante porque imos ter que compensar a escasa achega demográfica da poboación nacional con máis poboación estranxeira", explica o economista Roberto Bande.
Porque o crecemento demográfico segue en valores negativos. "Os nenos que nacen tamén son dos que veñen de fóra os de aquí non se animan", di unha muller.
O estilo de vida que ofrece a cidade tamén é reclamo. "É unha cidade tranquila que está moi ben para formar unha familia", di unha rapaza, e outra engade: "É pequena, pero ten de todo, vívese ben".
De confirmarse as cifras, Lugo sería a cuarta cidade galega máis poboada. Podería acceder a máis financiamento e habería cambios na organización do seu Concello, xa que tamén medraría o número de representantes.
