Lula di que Bolsonaro instigou o golpe

En relación ao asalto ás sedes institucionais en Brasilia, o presidente Lula fixo duras críticas ao sistema de intelixencia do Goberno federal.  Dixo que o devandito sistema non existiu cando as sedes dos tres poderes foron invadidas e depredadas por seguidores de Bolsonaro, que eses actos de vandalismo foron un intento de golpe de estado e que os membros das forzas armadas que queiran facer política deben renunciar ao seu cargo.

Tamén se referiu ao expresidente dicindo que ten a sensación de que Bolsonaro quería volver ao país na gloria dun golpe. Dos case 1.500 detidos por este motivo, o Goberno decretou prisión provisional para 140.